Բաքուն, գործածելով դիվանագիտական չվերթները, ավելի քան 3 տարի է՝ զենք է մատակարարում Արևելյան Եվրոպայի երկրներից ողջ աշխարհի հակամարտության գոտիներ։ Այս մասին գրում է բուլղարական «Տրուդ» թերթը։
«Ադրբեջանի պետական Silk Way Airlines ավիաընկերությունը դիվանագիտական չվերթների քողի ներքո իրականացրել է առնվազն 350 թռիչք և ամեն անգամ ահաբեկիչներին մատակարարել մի քան տասնյակ տոննա ծանր զենք և զինամթերք։ Տեղեկատվության հաստատմամբ փաստաթղթերը տրամադրել են Anonymous Bulgaria կազմակերպության ցանցահենները։ Կազմակերպությունը կոտրել է Բուլղարիայում Ադրբեջանի դեսպանատան կայքն ու փոստը»,-գրում է պարբերականը։
«Տրուդի» հաղորդմամբ՝ Silk Way Airlines-ը մասնավոր ընկերություններին, զենք արտադրող ձեռնարկություններին և տարբեր երկրների ռազմական գերատեսչություններին առաջարկել է դիվանագիտական չվերթներով սպառազինության մատակարարումներ իրականացրնել։ Նման չվերթները չեն ենթարկվում ստուգումների և միջազգային կանոնակարգման։ Նշվում է, որ այդ կերպ զենք է մատակարարվել Սիրիա, Իրաք, Աֆղաստան, Պակիստան, Կոնգո։
Ամենից հաճախ Բաքվի անօրինական բեռնափոխադրման ծառայությունից օգտվել են ԱՄՆ-ի ընկերությունները։ Ընդ որում՝ նրանց բոլորի բեռները մեկ առանձնահատկություն են ունեցել՝ զենքը ամերիկյան չափորոշիչներին չի համապատասխանել։ Բաքվի ծառայություններից ակտիվորեն օգտվել են նաև Սաուդյան Արաբիան և ԱՄԷ-ն։
Ադրբեջանական կողմին փոխադրումների հարցում օգնել է Բուլղարիայի ԱԳՆ-ն, որն էլ հենց անհրաժեշտ թույլատվություններ է տրամադրել դիվանագիտական չվերթների համար։ Հոդվածին կցված են նաև փաստաթղթերի պատճենները։
Դիվանագիտական ուղով Ադրբեջանի տեղափոխած զենքի մի մասը կապված է ղարաբաղյան հակամարտության հետ։ 2016-ին Ադրբեջանը Հայաստանին մեղադրեց սպիտակ ֆոսֆոր օգտագործելու մեջ։ Հայաստանը հերքեց այդ մեղադրանքները ու անձամբ մեղադրեց Ադրբեջանին՝ ասելով, որ այդ մեղադրանքները շինծու են։ Բուլղարիայում Ադրբեջանի դեսպանատան փաստաթղթերի համաձայն՝ սպիտակ ֆոսֆորով բեռը Բաքու է ուղարկվել նույն դիվանագիտական ուղիներով՝ 2015-ին։