Աշխարհում միջուկային զենքի թվաքանակը շարունակում է դանդաղ նվազել, միաժամանակ շատ երկրներ ոչ առաջին տարին է, որ հայտարարում են իրենց միջուկային զինանոցների արդիականացման ծրագրերի պահպանման ու զարգացման մասին։ Այս մասին հայտնում է Խաղաղության խնդիրների հետազոտման Ստոկհոլմի միջազգային ինստիտուտը (SIPRI)՝ կապված աշխարհում միջուկային զենքի պաշարների վերաբերյալ ամենամյա տվյալների հրապարակման հետ։ Այս մասին հայտնում է RIA Novosti-ն։
SIPRI-ի տվյալներով՝ 2017 թվականի սկզբին 9 երկրերի (ԱՄՆ, ՌԴ, Մեծ Բրիտանիա, Ֆրանսիա, Չինաստան, Հնդկաստան, Պակիստան, Իսրայել և Հյուսիսային Կորեա) տրամադրության տակ եղել է ընդհանուր առմամբ մոտ 14 935 միջուկային մարտագլխիկ։ Դա փոքր-ինչ քիչ է 2015-ի համեմատ (մոտ 15 395 միավոր)։ Միջուկային զենքի նշված քանակից օպերատիվ է համարվել մոտ 4150 միավորը։
Փորձագետներն առաջին տարին չէ, որ փաստում են, որ միջուկային զենքի կրճատում տեղի է ունենում գլխավորապես ԱՄՆ-ի և Ռուսաստանի միջուկային զինանոցների կրճատման հաշվին, որոնց բաժին է ընկնում միջուկային զենքի համաշխարհային պաշարների ավելի քան 93 տոկոսը։ Սակայն գործընթացը դանդաղ է ընթանում։
Միաժամանակ երկու երկրներում մշակված են միջուկային զենքի հետագա արդիականացման երկարաժամկետ և թանկարժեք ծրագրեր։ Օրինակ, ԱՄՆ-ը ծրագրում է 2017-26 թթ 400 մլրդ դոլար ծախսել իր միջուկային ուժերի թարմացման վրա։
Մյուս միջուկային պետությունների (Չինաստան, Հնդկաստան, Պակիստան) զինանոցները մեծ չեն, սակայն այդ երկրները նույնպես սկսել են արդիականացնել իրենց զինանոցները։