Հայաստանի կիոկուշին կարատեի ֆեդերացիան այսօր պաշտոնապես ճանաչում ստացավ Հայաստանի սպորտի և երիտասարդության հարցերով նախարարության կողմից: Մեր երկրում Կիոկուշին կարատեի ֆեդերացիան հիմնվել է դեռևս 2005 թվականին: Տարբեր տեսակի միջազգային մրցաշարերում մեր կարատեիստները ընդհանուր առմամբ նվաճել են 112 ոսկե, 91 արծաթե և 109 բրոնզե մեդալ, ինչը բավական բարձր ցուցանիշ է:
Հայաստանի կիոկուշին կարատեի ֆեդերացիայի ենթակայության տակ Հայաստանի գերթե բոլոր մարզերում և Արցախում մարզվում է շուրջ 3 հազար սան: Պատկառելի արդյունքերն ու տարված աշխատանքները հաշվի առնելով էլ Սպորտի և երիտասարդության նախարարությունը որոշում է կայացրել իր ենթակայության տակ վերցնել այս մարզաձևը: Ի դեպ, կիոկուշին կարատեն առաջին արևելյան մարզաձևն է, որն ընդգրկվում է պետական աջակցություն ստացող մարզաձևերի շարքերում: «Շնորհավորում եմ և հույս ունեմ, որ դուք կարդարացնեք սպասելիքները: Արևելյան մարարտարվեստների ֆեդերացիներին սպորտի նախարարությունը լուրջ ուշադրություն չի դարձում այն պատճառով, որ դրանք հարյուրից ավելի են:
Ով ցանկանում է ֆեդերացիա է հիմնում: Տարբեր տեսակի կարատեների հավաքականները 6 մարզիկով մասնակցելով աշխարհի առաջնությանը՝ 9 մեդալ են նվաճում, ինչը լուրջ չէ: Ֆեյք մրցաշարերի մասնակցելով աշխարհի չեմպիոնի կոչման արժեքն ուղղակի վարկաբեկվում է: Հայաստանի կիոկուշին կարատեի ֆեդերացիան իր աշխատանքով պետք է ապացուցի, որ արժանի է մեր աջակցությանը»,- հայտարարեց Հայաստանի սպորտի և երիտասարդության հարցերով նախարար Հրաչյա Ռոստոմյանը:
Հայաստանի կիոկուշին կարատեի ֆեդերացիայի նախագահ Անդրանիկ Հակոբյանն էլ հավաստիացրեց, որ ամեն ինչ կարվի՝ թե՛ սպորտի նախարարության, և թե՛ մարզասերների սպասելիքներն արդարացվելու համար: Ի դեպ, արդեն 2018 թվականի ապրիլին Երևանում կանցկացվի կիոկուշին կարատեի Եվրոպայի առաջնությունը, իսկ հոկտեմբերին տեղի կունենա Հայաստանի առաջնությունը, որին կմասնակցեն շուրջ 700 կարատեիստներ: