Սահմանամերձ գյուղերին տրված արտոնությունների արդյունքում քանի՞ աշխատատեղ է ստեղծվել, ի՞նչ արդյունք է տվել այդ օրենսդրական նախաձեռնությունը, ի՞նչ ներդրումներ կան: ԱԺ-ում 2016թ.-ի պետական բյուջեի կատարողականի քննարկման ժամանակ հարցրեց «Ծառուկյան» խմբակցության պատգամավոր Սերգեյ Բագրատյանը՝ դիմելով էկոնոմիկայի փոխնախարար Էմիլ Տարասյանին:
Փոխնախարարը պատասխանեց, որ այդ օրենսդրական նախաձեռնությունից հետո ձեռնոցների արտադրությամբ զբաղվող ընկերություն է ստեղծվել՝ 1400 աշխատատեղով։ Նա նշեց, որ այլ տվյալների չի տիրապետում, բայց ընդգծեց, որ լրացուցիչ սուբսիդավորումը՝ համայնքներին գյուղտեխնիկայի տրամադրումն ու վարկերը 2-3 տոկոսով տրամադրելը, լրացուցիչ խթան կհանդիսանան:
Պատգամավորը Բերդում 1200 նոր աշխատատեղի համար շնորհակալություն հայտնեց բնակչության անունից, բայց ասաց, որ սահմանամերձ համայնքում ոչ մի նոր աշխատատեղ չի ավելացել:
«Նախաձեռնեք աշխատատեղեր, ես կարող եմ բազմաթիվ ներքին միջոցներ մատնանշել, որոնք օգտագործելու պարագայում նոր աշխատատեղեր կստեղծվեն»,-նշեց Բագրատյանը:
Տարասյանն էլ նշեց, որ ամեն օր դրանով զբաղվում են:
«Ցանկացած նոր նախաձեռնություն, որ ուղղված է աշխատատեղերի ստեղծմանը, մենք ողջունում ենք»,- վստահեցրեց փոխնախարարը:
