Նախօրեին հայտնի է դարձել, որ Ազգային անվտանգության ծառայությունը դիմել է կրթության և գիտության նախարարությանը՝ ոչ պետական բուհերում հայտնաբերված խախտումները վերացնելու և հետագայում բացառելու ուղղությամբ միջոցներ ձեռնարկելու համար: «Ոչ պետական բուհերի երեք ռեկտորների կողմից շահադիտական դրդումներով դասընթացներին չմասնակցած, իսկ առանձին դեպքերում՝ նաև ընթացիկ ու ավարտական քննություններին չներկայացած անձանց կեղծ ավարտական դիպլոմներ հատկացնելու դեպքերով քրեական գործերով պարզվել են, որ դիպլոմներ են հատկացվել ՀՀ՝ 2, Իրանի՝ 1, ԱՄՆ՝ 8, ՌԴ՝ 2, Ուզբեկստանի՝ 1, Իսրայելի՝ 1, Վրաստանի՝ 5 քաղաքացիների»: Կեղծ դիպլոմներ տրամադրելու մեջ մեղադրվող՝ Հայաստանում գործող ոչ պետական երկու բուհերի ռեկտորներ, դատարանի որոշմամբ, մեղավոր են ճանաչվել, երրորդի վերաբերյալ նախաքննությունը շարունակվում է: Առաջին հայացքից հաղորդագրությունը, որ տարածվել է նախօրեին, գործնականում արտացոլում է Հայաստանի համար սովորական քրեական քրոնիկոնի մի դրվագ, որն ամենևին էլ նորություն կամ սենսացիոն բացահայտում չէ:
Սակայն ԱԱԾ դիմումը կրթության ու գիտության նախարարությանը հետաքրքրական է ինքնին: Գործնականում, ԱԱԾ-ն այսպես ասած «քարտ-բլանշ» է տալիս իր դիմումով կրթության ու գիտության նախարարին, իսկ հաշվի առնելով կոալիցիոն բաժանումը՝ այդ նախարարի պորտֆելը տնօրինող ՀՅԴ-ին: Բուհական համակարգը, անկախ պետական կամ ոչ պետական լինելուց, Հայաստանում քաղաքական ռեսուրս է: Թե ինչ շրջանակների ձեռքին է գտնվում այդ ռեսուրսը, դժվար չէ պատկերացնել: Այդ շրջանակներն իշխող համակարգի այս կամ այն մաս են, կամ իշխող ՀՀԿ-ի: Այսպիսով, ստացվում է, որ ՀՀԿ կոալիցիոն «փոքր եղբայր» ՀՅԴ-ն ԱԱԾ դիմումով ստանում է իշխող համակարգի տարբեր շրջանակների դեմ գործելու «քարտ-բլանշ»: Ավելորդ է թերևս ասել, թե ո՞ւմ իմացությամբ է ԱԱԾ-ն տալիս այդ «քարտ-բլանշը» կամ լծակը ՀՅԴ-ին՝ իհարկե Սերժ Սարգսյանի: Իսկ մյուս կողմից, ՀՅԴ-ն այդպիսով հայտնվում է նաև մեծ պատասխանատվության տակ՝ ստանում այսպես ասած կրկնակի փոխզսպման «քարտ-բլանշ», որովհետ և ԱԱԾ դիմումն արդյունավետ չսպասարկելու դեպքում, ՀՅԴ-ն փաստորեն կհայտնվի կեղծ դիպլոմների գործում ոչ բուհական համակարգի «հանցակցի» կարգավիճակում, դրանից բխող քաղաքական և գուցե իրավական հետևանքով:
Այդպիսով, ԱԱԾ՝ առաջին հայացքից սովորական դիմումը գործնականում պարունակում է բավականին ուշագրավ ներքաղաքական կամ ներիշխանական, գուցե նույնիսկ ներկոալիցիոն համատեքստ, հատկապես հաշվի առնելով այն քաղաքական իրավիճակը, որ առկա է 2018-ի խնդրի համատեքստում, և որտեղ իշխանության ամեն մի սանտիմետրը կարող է ունենալ որոշիչ նշանակություն հանգուցալուծման գործում: