«Ժողովուրդ» թերթն նախօրեին տեղեկացրել էր, որ այս օրերին ՀՔԾ հարցաքննության են հրավիրվում քրեական գործեր քննող դատավորները: Նրանց թիվն անցել է մոտ չորս տասնյակը:
Իսկ պատճառը եղել է այն, որ դատավորները կամ նրանց օգնականները դատավճիռները շատ դեպքերում օրենքով սահմանված կարգով չեն ուղարկել իրավապահ մյուս մարմիններին՝ ի կատար ածելու: Արդյունքում, ամբաստանյալները կալանավորվելու փոխարեն մնացել են ազատության մեջ, կամ կալանավայրից չեն տեղափոխվել համապատասխան ՔԿՀ, կամ տուգանքի գումարները չեն բռնագանձվել:
Մեր զրուցակից փաստաբանները գրեթե բոլոր դեպքերը գիտեին, երբ, իսկապես, դատավորները վճիռ կայացնելուց հետո այն չեն ուղարկել ի կատար ածման: «Կոնկրետ ես երկու փաստ գիտեմ, երբ դատարանը վճիռ է կայացրել, սակայն այն չի կատարվել, և գործով անցնողները կալանավորված մնալու փոխարեն 2-3 տարի մնացել են ազատության մեջ»,- ասաց մեր զրուցակից փաստաբանը:
Նրա խոսքերով՝ քիչ չեն նաև հակառակ դեպքերը, երբ դատարանի վճռով անձինք կալանավայրից պետք է դուրս գան ազատության մեջ, սակայն վճիռը չի կատարվում:
Մեր զրուցակից փաստաբանի խոսքերով՝ միանշանակ չէ, որ վճիռները չեն կատարվել հենց դատավորների մեղքով: Հնարավոր է, որ դատավորը ուղարկի վճիռը կատարման, սակայն այն այլ պատկան մարմինների կողմից չի կատարվել: Բայց շատ են նաև հակառակ դեպքերը:
Փաստաբանի խոսքերով՝ վճիռները չեն ուղարկվում կատարման երկու պատճառով, երբ առկա է կոռուպցիոն ռիսկ, այսինքն՝ դատավորը դրա համար գումար է վերցրել, կամ, որը քիչ է հանդիպում, պարզապես անփութության, անուշադրության հետևանք է:
ՀՔԾ-ից պաշտոնապես տեղեկություն ստանալ չհաջողվեց, որպեսզի հնարավոր լիներ պարզել՝ դատավորները իսկապես կանչվել են ՀՔԾ և ինչ կարգավիճակով: