Սյունիքի մարզի Գորիս համայնքը կմեկտեղի թթի սիրահարներին: Հուլիսի 1-ին անցկացվելու է Թթի փառատոնը: Այս տարի ծրագրում որոշ փոփոխություններ կան: Փառատոնի կազմակերպիչ «Արենի փառատոն» հինադրամի հիմնադիր տնօրեն Նունե Մանուկյանի խոսքով՝ այս տարի փառատոնն անցկացվելու է Քարահունջում։
«Այս տարի ծրագիրը Գորիս քաղաքից տեղափոխվել է Քարահունջ: Ինչպես գիտեք, համայնքների խոշորացում է տեղի ունեցել, Քարահունջն այժմ մտնում է Գորիսի խոշորացված համայնքի մեջ: Այնտեղ կան հրաշալի բարենպաստ պայմաններ փառատոնն անցկացնելու համար: Քարահունջում բազմաթիվ թթի ծառեր կան, այնտեղ հնարավորություն կունենանք բոլորով թութ թափ տալ, համտեսել»,-ասաց Նունե Մանուկյանը:
Այցելուներին սպասվում է հետաքրքիր տոնակատարություն: Փառատոնի հյուրերն ականատես կլինեն թթի օղու թորման արարողություն, իսկ ցանկության դեպքում տեղում կվայելեն խմիչքը, կզգան քաղցրահամ թթի բույրն ու համը: Փառատոնի ընթացքում լինելու է թթի դոշաբի, մուրաբայի, չրերի, Սյունյաց աշխարհին հատուկ ուտեստների համտես-վաճառք:
Փառատոնը, որն այս տարի կանցկացվի 4-րդ անգամ, նպատակ ունի խթանելու մարզում զբոսաշրջության զարգացմանը:
