Շատերին է ապշեցրել, թե Կենտրոնի ընդհանուր իրավասության առաջին ատյանի դատավոր Արմեն Բեկթաշյանը երեկ «Նորք-Մարաշ» զինված խմբի դատավարության ժամանակ ինչպես է նվաստացրել այս գործով ամբաստանյալ, նախկին փոխվարչապետ և պաշտպանության նախկին փոխնախարար, ըստ էության, հաշմանդամի վերածված Վահան Շիրխանյանին: Նրա «մեղքն» այն է եղել, որ ոտքի չի կարողացել կանգնել, իսկ Բեկթաշյանը որոշել է, որ դա անհարգալից վերաբերմունք է դատարանի հանդեպ, ու Շիրխանյանին հեռացրել է դատական նիստից:
Այսօր «Հայկական ժամանակ» օրաթերթը անդրադարձել է խիստ «օրինապաշտ» դատավորի հայտարարագրին` հայտնաբերելով, որ Բեկթաշյանն ու նրա կինը պարբերաբար նվիրատվություններ են ստացել: Իհարկե, հարգում ենք անմեղության կանխավարկածը, սակայն կոռումպացված Հայաստանում, կարծում ենք, հասկանալի է, թե ինչ ծագում ունեն պաշտոնյաների, հատկապես դատավորների ստացած նվիրատվությունները:
Սակայն նվիրատվությունները Բեկթաշյանի կենսագրության, ավելի շուտ՝ ֆինանսական վիճակի տեսանելի, բացահայտված դրվագներն են, սակայն Կենտրոնի դատավորի կյանքը հարուստ է նաև այլ իրադարձություններով, որոնք ծանոթ չեն հանրությանը:
90-ականների կեսերին, երբ նա ուսանել է ԵՊՀ իրավաբանության ֆակուլտետում, աչքի է ընկել ոչ թե բարձր առաջադիմությամբ, այլ կրիմինալ վարքագծով. եղել է համալսարանը «նայողներից» մեկը ու հայտնվել է մի քանի սկանդալների կիզակետում և քրեական հետապնդումից խուսափել է ոստիկանությունում աշխատող իր բարձրաստիճան բարեկամի հովանավորության շնորհիվ: Բեկթաշյանի կրիմինալ գործունեությունը զուգորդվել է նրա դաշնակցական գործունեության հետ: Այդ թվերին ՀՅԴ «Նիկոլ Աղբալյան» ուսանողական միությունն ակտիվորեն համագործակցել է ուսանողական կրիմինալ շրջանակների հետ:
Այս լույսի ներքո թերևս հասկանալի է դառնում, թե կրիմինալ և դաշնակցական բաղադրիչ ունեցող իշխանությունում ինչպես է տեղի ունեցել դատավոր Բեկթաշյանի պաշտոնական առաջխաղացումը: «Պատահական» մարդիկ չեն հայտնվում Կենտրոնի «էլիտար» դատարանում: Թերևս հասկանալի է, թե որտեղ է թաքնված նաև դատավորի երեկվա քինախնդրության արմատը:
Քիչ չեն նախկին ամբաստանյալները, ովքեր պատմում են դատական նիստերի ժամանակ այս դատավորի քրեական բառապաշարի և վարքագծի մասին: Չնայած այլ որակ դժվար էր ակնկալել այսօրվա իշխանություններից, որոնք ուղնուծուծով խրված են կրիմինալի մեջ:
Լուսանկարը՝ aravot.am-ի
