Կառավարությունն այսօր որոշում կկայացնի նոյեմբերի 5-ին Արտաշատի քաղաքապետի արտահերթ ընտրություններ նշանակելու մասին: Եթե չլիներ Հովիկ Աբրահամյանի գործոնը, ավելի ճիշտ՝ այն հանգամանքը, որ նա այլևս իշխանության ներկայացուցիչ չէ, այս ընտրությունները ներքաղաքական կյանքում որևէ էական դերակատարություն չէին ունենա:
Խնդիրը նույնիսկ Արտաշատի քաղաքապետի պաշտոնը կամ սպասվող ընտրությունները չեն: Անհրաժեշտ էր որևէ հրապարակային հարթակ, առիթ, որպեսզի համակարգն ու Աբրահամյանը միմյանց հետ վերջնականապես պարզեն իրենց հարաբերությունները: Դե յուրե Արգամիչը հեռացել է իշխանությունից, նույնիսկ ձևականորեն չմնաց ՀՀԿ-ում, մյուս կողմից` նա վերջնականապես չի խզել իր հարաբերություններն իշխանությունների հետ, նույնիկ հոգու խորքում, հավանաբար, մտածում է, որ դեռ պահանջարկված է լինելու Սերժ Սարգսյանի կողմից:
Արգամ Աբրահամյանը, ով ընտրվել է պատգամավոր «Ծառուկյան» դաշինքի ռեյտինգային ցուցակով, փաստացի շարունակում է գոնե միջնորդավորված ղեկավարել Արտաշատը և մամուլին ասել է, թե իրենք (տվյալ դեպքում պետք է հասկանալ՝ Հովիկ Աբրահամյանը) որոշել են թեկնածու ունենալ քաղաքապետի արտահերթ ընտրություններում:
Ով՝ ով, բայց Հովիկ Աբրահամյանը հրաշալի գիտի, որ եթե իշխանության բուրգն ունենա կոնսոլիդացված որոշում, ապա իրեն թույլ չեն տա յուրային քաղաքապետ ունենալ ոչ միայն Արտաշատում, այլ նաև գյուղապետ՝ հարազատ Մխչյանում:
Եվ ահա, երբ Աբրահամյանների ընտանիքը՝ կրտսերի շուրթերով, հայտարարում է, թե մտադիր է մասնակցել ընտրություններին, ապա դա իշխանությանն ուղղված համագործակցության ուղերձ է: Իշխանությունները դա հասկացել են խորհրդարանական ընտրություններից հետո, երբ հնչել է Արգամի հայտարարությունը, ու թերևս Արտաշատի ընտրությունները հունիսին չանցկացրին, որովհետև Սերժ Սարգսյանն առայժմ չունի Արգամիչի մեսիջի պատասխանը:
Մի կողմից՝ Հովիկ Աբրահամյանն իշխանությունից հեռացվել է, որովհետև անկանխատեսելի ու ամբիցիոզ գործիչ է, մյուս կողմից՝ նա պահվում է համակարգի «ռեզերվում»: Արգամիչը հմուտ ապարատային գործիչ է և դեռ կարող է պետք գալ Սարգսյանին, ընդ որում, տարբեր հարթակներում՝ սկսած ներիշխանական հարաբերություններից, վերջացրած ԲՀԿ-ով: Նվազագույնը այս փուլում Աբրահամյանը կարող է օգնել Սարգսյանին՝ նրան չխանգարելով:
Նոյեմբերի 5-ին Հովիկ Աբրահամյանը ցանկացած դեպքում դուրս է գալու իշխանության «ռեզերվից» համակարգային խաղի մեջ մտնելու կամ հակառակը՝ թոշակի անցնելու նպատակով:
Լուսանկարը՝ shabat.am-ի
