Սեպտեմբերին Փաստաբանների պալատում նախագահի ընտրություններ են և կրկին, ՓՊ խորհրդի ընտրությունների պես, խոստանում են բավականին թեժ լինել: Այս անգամ ևս մրցապայքարը ծավալվելու է Պալատում ձևավորված երկու թիմերի՝ գործող նախագահ Արա Զոհրաբյանի և նրա հակառակորդ թիմերի միջև: Ըստ էության կառաջադրվի գործող նախագահ Արա Զոհրաբյանը, և ըստ մամուլի հրապարակումների՝ նախկին նախագահ Ռուբեն Սահակայնը: Վերջինս, սակայն, «Առաջին լրատվական»-ի հետ զրույցում ասաց, որ դեռ հստակ որոշում չունի, սակայն կարծում է, որ տարիքն արդեն մեծ է նման գործերի համար:
–Պարոն Սահակյան, հնարավո՞ր է առաջադրվեք Պալատի նախագահի ընտրություններում:
-Ես Պուտինի պես կպատասխանեմ ձեր հարցին:
-Իսկ ինչպե՞ս է Պուտինը պատասխանում:
-Ոչ մի բան էլ չի պատասխանում, երբ եք տեսել, որ նա իրեն ուղղված հարցերին հստակ պատասխան տա:
-Իսկ ինչի՞ց է կախված Ձեր վերջնական որոշումը: Ի՞նչ պետք է լինի, որ Դուք վերջնականապես կողմնորոշվեք:
-Ոչ մի բանից: Ոչ մի բան էլ չեմ մտածում: Ինձ համար տանը նստած աշխատում եմ:
–Իսկ հնարավոր է՝ վերջին պահին որոշում կայացնեք մասնակցել ընտրություններին՝ փրկելու պալատի հեղինակությունը: Ձեր պաշտոնավարման տարիներին փաստաբանները Ձեզ շատ էին հարգում, և Պալատն այն վիճակում չէր, ինչ հիմա:
–Հա, շատ էին հարգում, այնքան, որ ձայն չտվեցին: (Ծիծաղում է): Չգիտեմ ձեզ ինչ ասեմ: Ես պատասխան չունեմ ձեր հարցին: Բայց գտնում եմ, որ դրա անհրաժեշտությունը չկա:
–Բայց փորձ ունե՞ք կուտակած:
-Իհարկե ունեմ, այո: Բայց չեմ ուզում, տարիքս արդեն այն չէ, և ոչ ոք ինձ չի կարող համոզել առաջադրվել:
-Պարոն Սահակյան, Պալատում հիմա շատ խնդիրներ են կուտակվել: Փաստաբանները սկսել են իրենց խնդիրները լուծել բռունցքներով: Ձեր կարծիքով՝ այս խնդիրներն ինչպե՞ս պետք է կարգավորվեն: Պալատի հեղինակությունը, որը վտանգի տակ է, ինչպե՞ս պետք է վերականգնվի:
-Չեն կարող էլ այդպես անել, որ նախկինի պես լինի: Մարդու նոր տեսակ է պետք: Այն տեսակը, որը որ կա, չի կարող Պալատի հեղինակությունը բարձրացնել:
–Բայց Դուք էիք չէ, որ ժամանակին առաջադրեցիք Արա Զոհրաբյանի թեկնածությունը՝ որպես Ձեզ արժանի փոխարինող:
-Ինչ է, սխալվելու իրավունք չունե՞մ ես:
-Համարում եք՝ սխալվե՞լ եք Արա Զոհրաբյանի հարցում:
-Մենք շատ շեղվեցինք խնդրից: Այսքանը:
Նշենք նաև, որ Արա Զոհրաբյանի թեկնածությունից զատ, ոչ մի հստակ առաջադրում դեռևս չկա: Նույն Ռուբեն Սահակյանի թիմում ևս որոշակիություն չկա: Նրանք բոլորն էլ համարում են, որ դեռ վաղ է դրա մասին խոսելը: