Ռուսաստանի Պետդումայի պաշտպանության կոմիտեի նախագահ Վլադիմիր Շամանովը հաստատել է տեղեկատվությունը, որ Ռուսաստանը բանակցություններ է վարում Ղազախստանի ու Ղրղըզստանի հետ` Սիրիա նրանց զինվորականներին ուղարկելու հարցում: Այս լուրը հաստատել է նաև Թուրքիայի նախագահի ներկայացուցիչը` հավելելով, որ Ղազախստանի ու Ղրղըզստանի զինվորականները ծառայությունն իրականացնելու են Ռուսաստանի, Թուրքիայի և Իրանի եռակողմ նախաձեռնությամբ Սիրիայում ձևավորված դեէսկալացիոն գոտիներում:
Անշուշտ, Աստանան ու Բիշքեկը սուվերեն որոշումներ կայացնելու իրավունք ունեն, այստեղ մեզ անհանգստացնում է այլ հանգամանք: Նախաձեռնության հեղինակը Ռուսաստանն է, իսկ խնդիրը վերաբերում է ՀԱՊԿ անդամ այլ երկու պետությունների: Մոսկվան ինչպես է պարտադրում իր դաշնակիցների «ինքնակամ» որոշումները` մենք հրաշալի գիտենք: Տեղյակ ենք նաև, որ Ռուսաստանը հետևողականորեն փորձում է սիրիական հարցն օրակարգային դարձնել ՀԱՊԿ-ում, և վերը նշված տեղեկատվության համատեքստում առաջանում են գլոբալ և կոնկրետ մտահոգություններ:
Սիրիական կամպանիան Ռուսաստանը նախաձեռնել է միայնակ` առանց ՀԱՊԿ իր դաշնակիցների հետ համաձայնեցնելու: Հիմա, երբ Մոսկվայի ռեսուրսները չեն հերիքում, նա փորձում է իր ավանտյուրային մասնակից դարձնել ՀԱՊԿ անդամ այլ երկրների: Սա ստեղծում է վտանգավոր մի նախադեպ, երբ ՀԱՊԿ անդամ երկրները դառնալու են Ռուսաստանի կայսերական ձեռնարկումների մասնակիցները` հավասար պատասխանատվություն կրելով հնարավոր ֆիասկոյի հետ:
Արդյո՞ք Ռուսաստանը Հայաստանի հետ բանակցել է հայաստանցի զինվորներ Սիրիա ուղարկելու հարցում, կամ արդյո՞ք սպասվում են նման բանակցություններ: Ինչպիսի՞ն է լինելու Հայաստանի իշխանության արձագանքը, արդյո՞ք Երևանում գիտակցվում է, որ սիրիական արյունոտ թատերաբեմում ներքաշվելը ահաբեկչության հնարավոր թիրախ կդարձնի մեր երկիրը: Մյուս կողմից` սիրիական հարցում չեզոքության խախտումը և Մոսկվայի նախաձեռնություններին հնարավոր մասնակցությունը կարող է վատ անդրադառնալ մեր երկրի և արևմտյան գործընկերների հարաբերությունների վրա` անուղղակի բացասական հետևանք առաջացնելով ղարաբաղյան կարգավորման գործընթացում: Հուսանք, որ Հայաստանի իշխանության վերնախավում գիտակցում են այս ռիսկերը, եթե նույնիսկ համապատասխան առաջարկ ստացել են Մոսկվայից:
