Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվելու է Անի Հովհաննիսյանի վերաբերյալ քննվող քրեական գործի դատաքննությունը: ԱԺ պատգամավոր Տիգրան Ուրիխանյանն այսօր վերջապես ներկայացել է դատարան և ցուցմունք տվել:
Անի Հովհաննիսյանի պաշտպանի խոսքերով՝ Տիգրան Ուրիխանյանը դատարանում իր ցուցմունքի ժամանակ պնդել է իր նախաքննական ցուցմունքը, բայց այն հիմնական հանգամանքը, որը վերաբերում է նրան, թե արդյոք Անի Հովհաննիսյանը գումար պահանջել է, թե ոչ, նման բան դատարանում չի հաստատվել: «Ոչ միայն ես, այլև դատարանը Տիգրան Ուրիխանյանին ուղղեց այն հարցը, թե արդյոք Անի Հովհաննիսյանը իրենից գումար պահանջել է, թե ոչ, բայց այդ փաստը չհաստատվեց: Ուրիխանյանի ցուցմունքով Անի Հովհաննիսյանի մեղքը չհաստատվեց»,- ասաց Սիմոնյանը:
Այսօր Տիգրան Ուրիխանյանից բացի ցուցմունք է տվել նաև Անի Հովհաննիսյանը, հերքել է իրեն առաջադրված մեղադրանքը:
Դատաքննությունը, ըստ էության, ավարտվում է, մնացել է դատարանի հարցերը: Լիպարիտ Սիմոնյանի խոսքերով՝ դատավճռով ամեն ինչ կընկնի իր տեղը:
Հիշեցնենք, որ «Առաջին լրատվական»-ը գրել էր, որ Ուրիխանյանը վճռական է տրամադրված: Նա դեռ իր շրջապատում հայտարարում էր, որ գնալու է դատարան և պատռելու է Անի Հովհաննիսյանի դիմակը, ինչի համար ունի բավարար ապացույցներ, որոնք ներկայացնելու է միայն դատարանում: Դրանից զատ, ԲՀԿ ղեկավար Գագիկ Ծառուկյանը Ուրիխանյանին հանձնարարել է վերջնականապես փակել թեման՝ կամ գնալ դատարան, պատմել ամբողջ ճշմարտությունը, հաստատել իր նախաքննական բողոքն ու ապացուցել դրա ճշմարտացիությունը, կամ հակառակը, բայց փակել թեման: