Ստեփանակերտում անցկացված «Հայկական քաղաքական կուսակցությունների» երրորդ ֆորումի ընթացքում ՀՀ ԱԺ «Ելք» խմբակցության պատգամավոր Էդմոն Մարուքյանը հայտարարել է. «Ամեն անգամ, երբ դուք շնորհավորում եք Հարավային Օսիային, Աբխազիային, Մերձդնեստրին, Ղրիմին՝ մենք խնդիր ենք ունենում»:
Արցախի խորհրդարանի խոսնակ Աշոտ Ղուլյանը «Առավոտի» հետ զրույցում պարզաբանել է, թե իրենք ողջունել են ինքնորոշման բոլոր սուբյեկտներին՝ նաև Կոսովոյին ու Հարավային Սուդանին։
Փորձագետ Ռուբեն Մեհրաբյանը, մինչդեռ, «Առաջին լրատվական»-ի հետ զրույցում նկատեց՝ Աշոտ Ղուլյանը խոր թյուրիմացության մեջ է. «Եթե հետևենք իր տրամաբանությանը, ապա պետք է ողջունել նաև Հյուսիսային Կիպրոսի «անկախությունը», ԻՊ-ի «անկախությունը», Ուկրաինայի՝ ԼՆՌ-ի, ԴՆՌ-ի «անկախությունը»։ Դրանք Ղարաբաղի կողքին դնելը, Ղարաբաղի բարձրաստիճան պաշտոնյայի կողմից վիրավորական է ցանկացած ղարաբաղցու, հայի, մարդկային բանականության համար»։
Նրա խոսքերով՝ Ղարաբաղյան հակամարտությունը որևէ առնչություն չունի հետխորհրդային երկրների կոնֆլիկտների հետ. «Որովհետև նրանց սատարել է Ռուսաստանը, իսկ այն ինչին հասել է Ղարաբաղը՝ հասել է ի հեճուկս Ռուսաստանի։ Այդ ամենը խառնել մի դեզի մեջ՝ տրամաբանական սխալ է։ Դուք վկայակաչում եք Էդմոն Մարուքյանի հարցը, որն էլ այս մեկնաբանության համար առիթ հանդիսացավ։ Հարցին անդրադարձավ նաև Դավիթ Շահնազարյանը՝ ներկաների ուշադրությունը հրավիրելով խնդրի վրա։ Ես կարծում եմ՝ պարոն Ղուլյանի պատասխանը իրականության հետ կապ չունի և բոլոր առումներով դուրս է Ղարաբաղի շահերից»,- ընդգծեց Մեհրաբյանը։
Հիշեցրեցինք, որ երբ Ղրիմում տեղի ունեցավ հանրաքվե՝ Արցախում դա ընդունեցին հրավառությամբ և շնորհավորանքներով. «Ես դրան անդրադարձել եմ, կրկնեմ՝ դա զորիբալայանական մտածողության դրսևորում է։ Այլ բան, քան «խայտառակություն» որակելը դժվար է։ Դա առայժմ որոշ պաշտոնյաների աշխարհահայացքի մեջ թողած հետք է, այդ հետքերը պետք է շիկացած երկաթով արմատախիլ արվի»,- եզրափակեց նա։
