Հունիսի 19-ին Ստեփանակերտից Երեւան է տեղափոխվել հունիսի 17-ին Արցախում գլխի հրազենային թափանցող վիրավորում ստացած եւս մեկ զինծառայող՝ 1997 թ. ծնված Յուրի Զաքարյանը: Այս մասին լրագրողների հետ հանդիպման ժամանակ հայտնել է ՊՆ կենտրոնական կլինիկական զինվորական հոսպիտալի վերակենդանացման բաժանմունքի պետ Գայանե Հովհաննիսյանը՝ հավելելով. «Գլխի հրազենային թափանցող վիրավորում ունի, վիճակը ծայրահեղ ծանր է, գիտակցությունը բացակայում է, արհեստական շնչառության ապարատին է միացված: Նա վիրահատվել է Ստեփանակերտում, առայժմ միջամտության կարիք չկա»:
Հիշեցնենք՝ ԼՂ պաշտպանական գերատեսչությունը անցած շաբաթ հաղորդել էր, որ ադրբեջանական կողմի գործողությունների հետևանքով հայկական կողմը չորս զոհ ունի:
Շաբաթ օրը Ղարաբաղից երկու վիրավոր էր տեղափոխվել Երևան, որոնցից մեկն այժմ գտնվում է Մալայանի ակնաբուժական կենտրոնում, մյուսը՝ Կենտրոնական հոսպիտալում: Առողջապահության նախարարության հաղորդմամբ՝ 33-ամյա պայմանագրային զինծառայողի աչքերը վիրահատվել են, և եթե բարդություններ չլինեն, նրա տեսողությունը կվերականգնվի:
Ինչ վերաբերում է մյուս զինծառայողին՝ 20-ամյա Արմեն Վարդանյանին, ապա Գայանե Հովհաննիսյանի փոխանցմամբ, նրա վիճակը կայուն ծանր է: