«Առաջին լրատվական»-ի զրուցակիցն է Nuvelles D՛Armenie ամսագրի խմբագիր Արա Թորանյանը: Հունիսի 18-ին Ֆրանսիայում կայացած խորհրդարանական ընտրությունների երկրորդ փուլի արդյունքներով խորհրդարան է անցել երեք հայազգի թեկնածու և Վիերզոն քաղաքից՝ Նադյա Եսայանը, ում ամուսինը հայ է:
– Պարոն Թորանյան, նախագահ Էմանուել Մակրոնի «Առաջ, Հանրապետություն» կուսակցությունից 3 ֆրանսահայեր առաջին անգամ պատգամավոր ընտրվեցին՝ Ժակ Մարիլոսյանը՝ Փարիզից, Դանիել Կազարյանը ՝ Լիոնից, 30-ամյա Գիյոմ Կասբարյանը՝ Շարտր քաղաքից, Նադյա Եսայանը, որի ամուսինն է հայ, ընտրվել է Վիերզոն քաղաքից: Ի՞նչ սպասելիքներ կան նրանից: Ի՞նչ քայլեր կարող են նրանք անել Արցախի խնդրի կարգավորման, Ցեղասպանության միջազգային ճանաչման ուղղությամբ:
– Նրանց՝ Ազգային ժողովում ներկայությունը, անշուշտ, լավ է: Անշուշտ, լավ է, որ հայերը մասնակցություն են ունենում Ֆրանսիայի քաղաքական և հասարակական կյանքին: Եվ հույս ունեմ, որ մեր շահերը պետք է պաշտպանեն: Նրանցից մեկին՝ Նադյա Եսայանին, շատ երկար տարիներ ճանաչում ենք: Նա երկար տարիներ ընդգրկված է եղել Հայ Դատի աշխատանքներում: Բացի այդ, պարոն Մակրոնը խոստացել է պաշտպանել մեր պահանջները, հիմա պետք է տեսնենք՝ նրա խոսքը կյանքի կկոչվի՞, թե՞ ոչ: Հիշում եք՝ Էմանուել Մակրոնը Փարիզում ապրիլի 24-ին այցելել է Կանադայի հրապարակում գտնվող Կոմիտասի հուշարձան և հարգանքի տուրք մատուցել Հայոց ցեղասպանության զոհերի հիշատակին: Հենց այդ օրը՝ ապրիլի 24-ին, խոսել ենք, համաձայնության եկել Ցեղասպանության հարցի, Թուրքիայի կողմից ուրացման հարցի շուրջ, Թուրքիայի՝ ԵՄ անդամակցության և Հայաստանի հետ կապերը ամրապնդելու վերաբերյալ: Պետք է սպասենք արդյունքներին, որ խոստումներն իրականություն դառնան։ Այս ամենը դրական է, մնացածը պետք է տեսնենք ապագայում: Համենայնդեպս, լավատես ենք, որ պայքարը պետք է շարունակվի, և պահանջները ճիշտ են:
– Մայիսի 29-ին Վերսալյան պալատում հանդիպեցին Ֆրանսիայի նորընտիր նախագահ Էմանուել Մակրոնը և Ռուսաստանի նախագահ Վլադիմիր Պուտինը: Հանդիպումն անցավ լարված մթնոլորտում, Մակրոնը քննադատեց ռուս լրագրողներին: Ինչպե՞ս եք գնահատում այդ հանդիպումը:
– Հստակ է, մենք ռուսոֆիլ չենք, և հստակ է, որ մենք կփորձենք և կկարծենք ու ավելի ուրախ կլինենք, որ Ֆրանսիա-Ռուսաստան հարաբերությունները բարելավվեն, զորանան, բայց դա մեր առաջին և հիմնական պայքարը չէ:
– Մարին Լե Պենի «Ազգային ճակատը» 8 մանդատ ունի ԱԺ-ում: Կարծում եք՝ հետաքրքիր բախումներ կլինե՞ն ԱԺ-ում:
– Նախկին երկու մանդատի փոխարեն՝ այս անգամ ութ պատգամավոր է ներկայացվել, և լավ է իրենց համար: Մնացածը առաջիկայում կերևա:
– Ֆրանսիայում իշխանություն է փոխվել, Հայաստանում կառավարություն է ձևավորվել. այս ութ ամիսներին որևէ պաշտոնական այց Ֆրանսիա տեղի չի ունեցել կառավարության և նոր վարչապետի մակարդակով: Ի՞նչ եք կարծում՝ տնտեսական հողի վրա այդ հարաբերությունները բարելավելու հնարավորություն կա՞:
– Չեմ կարող ասել, բայց հույս ունեմ, դեռ շատ վաղ է դրա մասին խոսելը: Մեկ ամիս է՝ իշխանություն ունի, և հստակ է, որ իր գործերի մեջ Հայաստանը և Հայաստանի խնդիրները առաջնային չեն, Ֆրանսիայում կան լեզվի խնդիրներ, կան և տնտեսական դժվարություններ, աշխատանքի խնդիր կա, տկարություն շատ կա: Համենայնդեպս, մեր խնդիրները մեզ համար առաջնային են, և մենք եկող ամիսների ընթացքում պետք է տեսնենք՝ ինչ քայլեր են կատարվում, և արդեն ուզել ենք նրա հետ ժամադրություն ունենալ: Մինչև դեկտեմբեր նրա հետ հանդիպում կունենանք և կխոսենք հայկական հարցերից ու կներկայացնենք խնդիրները:
