ՀՀ կառավարությունը հունիսի 15-ի նիստի ընթացքում հավանություն է տվել Հայաստանի ռազմարդյունաբերական զարգացման ծրագրին, որը բխում է 2017թ. հունվարին ՀՀ նախագահի կողմից ստորագրված Ռազմարդյունաբերական և ռազմատեխնիկական քաղաքականության ռազմավարությունից: Ծրագիրը մշակվել է Հայաստանի Ռազմարդյունաբերական պետական կոմիտեի կողմից:
Առաջնահերթություններ
Ի՞նչն է ծրագրի հիմնական նպատակը: Ըստ ռազմավարական փաստաթղթի՝ պետությունը ծրագրում է զինված ուժերին անհրաժեշտ սպառազինությունների և ռազմական գույքի մի մասը արտադրել երկրի ներսում: Իսկ դրա համար հարկավոր է զարգացնել երկրի ռազմարդյունաբերական համալիրը (ՌԱՀ): Ռազմավարության մեջ նշվում են մասնավորապես հետևյալ առաջնահերթությունները՝
1) ամրապնդել ՌԱՀ-ի դերը Հայաստանի տնտեսության նորարարական զարգացման մեջ,
2) հասնել Հայաստանում արտադրվող և արտերկրից ներկրվող սպառազինությունների, ռազմական տեխնիկայի ծավալների օպտիմալ հարաբերակցության,
3) ապահովել ՌԱՀ-ի կազմակերպությունների արտադրանքի մրցունակությունն արտերկրի շուկաներում:
ԱԹՍ-ներ և հրաձգային զենք
Հայաստանի ռազմարդյունաբերական ոլորտը զարգացնելու անհրաժեշտությունն, անշուշտ, ակնհայտ է՝ հատկապես անվտանգության ներկայիս սպառնալիքների և կիսապատերազմական վիճակի պայմաններում, բայց մյուս կողմից՝ ծրագրի կենսագործման հեռանկարներն էլ առայժմ անորոշ են՝ այդ թվում տեղեկատվության պակասի պատճառով:
Մոսկվայի Քաղաքական և ռազմական վերլուծությունների կետրոնի փոխտնօրեն, ռազմական փորձագետ Ալեքսանդր Խրամչիխինը ասում է, թե Հայաստանում արտադրվում են ռազմական տարբեր սարքավորումներ՝ մասնավորապես անօդաչու թռչող սարքերի (ԱԹՍ) բազայում, բայց վերջնական արտադրանք առայժմ չկա:
«Եթե Հայաստանն ուզում է ունենալ իր ռազմական արդյունաբերությունը, ապա, ըստ երևույթին, ստիպված է լինելու կառուցել այն գրեթե զրոյից: Ակնհայտ է, որ այս հարցում Հայաստանը առաջին հերթին հենվելու է Ռուսաստանի օգնության վրա, և եթե նա փորձի արտադրել սեփական զենք, ապա դա լինելու է կա՛մ ռուսական լիցենզիայով, կա՛մ գոնե Ռուսաստանի օգնությամբ»,- նշեց փորձագետը «Առաջին լրատվական»-ի հետ զրույցում:
Հայտնի է, որ Հայաստանն արտադրում է ԱԹՍ-ների որոշ տեսակներ: Փորձագետ Ալեքսանդր Խրամչիխինի խոսքով՝ Հայաստանը կարող է արտադրել նաև հրաձգային զինատեսակներ, բայց ծանր զինտեխնիկայի արտադրություն այս պահի դրությամբ Հայաստանում չկա:
«Ռազմածովային սպառազինություն Հայաստանին ակնհայտորեն պետք չէ: Ավիացիոն տեխնիկա, կարծում եմ, Հայաստանը տեսանելի ապագայում չի կարող արտադրել: Ըստ երևույթին, արտադրվելու են զենքեր ցամաքային ուժերի համար, հնարավոր է՝ հրթիռային զինատեսակներ: Բայց հիմա դժվար է ասել: Սովորաբար սկսում են հրետանու և թեթև զրահատեխնիկայի արտադրությունից»,- ավելացրեց Ալեքսանդր Խրամչիխինը: