«Հայաստանում փոքր ավիացիայի զարգգացման համար բոլոր հնարավորությունները կան, բայց մենք տարիներ շարունակ այդ հնարավորությունից չենք օգտվել»,-«Առաջին լրատվական»-ի հետ զրույցում ասաց «Օդաչուների ազգային միավորում» հասարակական կազմակերպության ղեկավար Դմիտրի Ադբաշյանը:
Հիշեցնենք, որ նախօրեին Սյունիքի մարզի Կապան քաղաքի օդանավակայանում առաջին օդանավը փորձնական վայրէջք կատարեց:
Սյունիքի մարզպետի խորհրդական Ռոբերտ Հայրապետյանը տեղեկացրել էր, որ առաջին կանոնավոր չվերթները կլինեն շուտով: Այս տեսանյութը մեծ արձագանք գտավ համացանցում, ինչին հաջորդեց քաղավիացիայի պարզաբանումը, որտեղ մասնավորապես ասված էր. «Ռուսաստանի Դաշնությունում գրանցված օդանավի՝ ՌԴ քաղաքացի օդաչուն ՀՀ կառավարությանն առընթեր քաղաքացիական ավիացիայի գլխավոր վարչություն հայտ է ներկայացրել Կապանի ուղղությամբ մասնավոր թռիչք իրականացնելու նպատակով: Օդաչուն, հասնելով Կապանի տարածք, այն ուսումնասիրել է օդից և, վայրէջք կատարելու համար այն պիտանի համարելով, օդանավը նստեցրել է հարմար հրապարակում, որը Կապանի օդանավակայանի վազքուղու մի մասն է: Համաձայն սահմանված կարգի՝ օդաչուն թռիչքի մասին տեղեկացրել է օդային երթևեկության կառավարման մարմիններին: Օդանավում է գտնվել նաև ՀՀ-ի բոլոր օդանավակայաններում բազմիցս թռիչքներ իրականացրած ՀՀ պատվավոր օդաչու Գարուշ Նիկողոսյանը»:
Նշենք, որ Կապանի օդանավակայան վերջին անգամ թռիչք իրականացվել էր շուրջ 27 տարի առաջ:
Կապանի օդանավակայանի թռիչքից հետո «Առաջին լրատվական»-ը գրեց, որ օդանավը պատկանում է Կրասնոդար քաղաքում բնակվող հայազգի Սիմոն Մնոյանին, որը Կրասնոդար քաղաքում ունի իր անձնական օդանավակայանը և հանդիսանում է «ՍԻՄ» ավիաընկերության հիմնադիրը և ամերիկյան «Փայփեր» ինքնաթիռնեի պաշտոնական ներկայացուցիչը Ռուսաստանի Դաշնությունում: Հենց նա էլ Հայաստանում իրականացված փորձնական թռիչքի հեղինակն էր՝ հույս ունենալով զարգացնել փոքր ավիացիան Հայաստանում:
Ադբաշյանի խոսքերով՝ այս ամենում ոչ մի զարմանալի բան չկա: 80-ական թվականներին տասնյակ թռիչքներ էին իրականացվում Կապան, Գորիս, Ջերմուկ և այլ ուղղություններով: «Շատ մեծ պահանջ կա ժողովրդի կողմից, բայց այդ պահանջը չի բավարարվում: Բացի այդ, նշված ուղղություններով ճանապարհները ոչ մի ստանդարտի չեն համապատասխանում: Իսկ Սովետական Միության ժամանակ այդ ճանապարհների նորոգումը, ստանդարտներին համապատասխանեցումը համաձայնեցվում էր քաղավիացիայի հետ: Բայց այսօր Հայաստանի ոչ մի ճանապարհ չի համապատասխանում անգամ մարդատար ավտոմեքենաների պահանջներին: Բայց չնայած այդ ամենից զատ, մենք չունենք փոքր ավիացիա, ինչը շատ վատ է»,- հավելեց Ադբաշյանը:
Նրա խոսքերով՝ եթե ոլորտը Հայաստանում զարգանա, շատ բան կփոխվի: «Տարիներ առաջ, երբ մենք թռիչքներ էինք իրականացնում Կապան և այլ ուղղություններով, առաջին թռիչքների ժամանակ այդ քաղաքներում մեծ արտագաղթ կար, բայց հենց թռիչքները դարձան կանոնավոր, լրիվ հակառակ պատկեր ունեցանք: Այդ քաղաքներից այլևս մարդկանց արտահոսք չկար, այլ հակառակը՝ մարդիկ հետ էին գալիս ապրելու իրենց քաղաքներում: Ասածս այն է, որ փոքր ավիացիայի զարգացումը նորից աշխուժացում կբերի Հայաստանի տարբեր քաղաքներում և կյանքը նորից կսկսի եռալ»,- նկատեց մեր զրուցակիցը:
Դմիտրի Ադբաշյանի խոսքերով՝ այսօր Հայաստանում փոքր ավիացիայի զարգացման համար բոլոր հնարավորությունները կան և բնավ պետք չէ, որ պետությունը գումար տրամադրի ոլորտի զարգացման համար, նորդրողների հրավիրի: «Այսօր բոլոր հնարավորությունները կան: Փառք Աստծո, դեռ կան մարդիկ, ովքեր մեծ ցանկություն ունեն ոլորտը զարգացնել, աշխուժացնել: Պարզապես Հայաստանում փոքր ավիացիան զարգացնելու ցանկություն պետք է հայտնել, և մեր միավորումը պատրաստ է մնացած խնդիրները լուծել: Եվ բնավ պետք չէ հույսը դնել պետական աջակցության, փողերի վրա»,- եզրափակեց Ադբաշյանը:
Լուսանկարները՝ hetq.am-ի
