«Առաջին լրատվական»-ի զրուցակիցն է ԱԺ «Ելք» խմբակցության պատգամավոր Մանե Թանդիլյանը։
-Նախօրեին Նիկոլ Փաշինյանը և Դուք հանդիպել եք անազատության մեջ գտնվող Անդրիաս Ղուկասյանի ու Դավիթ Հովհաննիսյանի հետ: Ինչո՞ւ հենց այս երկուսի, թե՞ շարունակական կլինեն այս հանդիպումները:
-Մենք այցելել ենք «Նուբարաշեն» ՔԿՀ-ում պահվող այլ անձանց ևս: Որոշ դեպքերում դա արել ենք իրենց կամ իրենց ընտանիքների դիմումի համաձայն: Մենք պատրաստվում ենք Անդրիաս Ղուկասյանի խափանման միջոցը փոխելու մասին միջնորդությամբ հանդես գալ: Այդ կապացությամբ նաև կարիք կար իրեն անձամբ տեսնելու: Դավիթ Հովհաննիսյանի մասին տեղեկությունները լայն տարածում չունեն, կարիք կար ծանոթանալու նաև նրա կալանավորման հետ կապված որոշ մանրամասների հետ:
-Ի վերջո, նրանց, ում այցելել եք, քաղբանտարկյալ համարո՞ւմ եք, թե՞ ոչ:
-Անդրիաս Ղուկասյանի հետ զրույցում նա հայտնեց կարծիք, որ իրեն հետապնդում են քաղաքական հայացքների պատճառով: Դավիթ Հովհաննիսյանի հետ նման զրույց չենք ունեցել: Գործի մանրամասներին մենք չենք տիրապետում, և պնդել որևէ բան չենք կարող: Սակայն տրամաբանական հարցեր կարող են առաջանալ, օրինակ, թե ինչու չի փոխվում նրա խափանման միջոցը:
-Համացանցում մի քանի օր է քննարկվում է Էդմոն Մարուքյանի այն դիտարկումը, ըստ որի՝ «Սասնա ծռերի» գործողություններում քրեական հանցակազմ կա: Ինչպե՞ս եք Դուք գնահատում այս հայտարարությունը: Սա ձեր բոլորի՞ մոտեցումն է:
-Էդմոն Մարուքյանի դիտարկումը կոնտեքստից և իրավական հարթությունից դուրս է քննարկվում, որը խեղաթյուրում է միտքը: Գիտեք, որ այդ օրերին բոլորս գտնվել ենք այդ շարժման մեջ՝ շարունակելով կարծել, որ այս ճանապարհը ոչ միայն դատապարտված է ձախողման, այլև ժողովրդավարական երկիր կառուցելու ճանապարհ չէ, և արյունահեղությունն անհրաժեշտ էր կանխել: Եթե որևէ մեկը կպնդի, որ «Սասնա ծռերի» գործողություններում ամեն բան օրինական է, և դրա արդյունքում ապօրինի զենքի կրում, սպանություններ չեն եղել, ես առնվազն կզարմանամ: Այլ բան է, որ խաթարված է հավատը արդար դատարանի նկատմամբ, բայց դա հիմք չէ ոչ ադեկվատ դատողությունների:
-Հայաստանում երբ առաջիկա հինգ տարիներին ընտրություններ չկան և չկա ընտրություններով իշխանություն փոխելու հնարավորություն առաջիկա տարիներին, ինչպե՞ս է հնարովոր հասնել այդ փոփոխություններին: Եթե արտախորհրդարանական հզոր բևեռ ձևավորվի, կմիանա՞ք արդյոք:
-Դեռ նոր են ավարտվել ընտրությունները, և մենք ականատես ենք եղել այնպիսի իրողությունների, որը թույլ է տալիս կարծել, որ հասարակությունը պատրաստ չէ համախմբվելու սոսկ իշխանափոխության լոզունգի ներքո: Մենք չենք կարող մեզ թույլ տալ չլինել իրատես: Արտախորհրդարանական ուժերի հզոր բևեռ կարող էր ձևավորվել մինչև ընտրությունները, սակայն տեղի չունեցավ: Այդ ի՞նչ փոխվեց այս մի քանի ամսվա մեջ, որ առկա չէր այն ժամանակ: Եթե ընդհանուր նպատակը չի համախմբել այս ուժերին, մնում է կարծել, որ համախմբումը ակնկալվում է իրականացնել ընդհանուր «դժբախտության»՝ խորհրդարանից դուրս հայտնվելու իրողության շուրջ, որը չի կարող հանրային օրակարգ ձևավորել: Ցավում եմ, երբ քաղաքական ուժերը խուսափում են առերեսվել իրողության հետ, որի արդյունքում մարգինալանում են հասարակությունից:
Լուսանկարը՝ Photolure-ի