Ժամեր առաջ հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.):
Այս տղաների, մյուս զոհերի համար պատասխանատու է ոչ միայն Ալիևի արյունարբու ռեժիմը, այլ նաև Հայաստանի իշխանությունը` ցինիզմին հասնող իր անտարբերությամբ, հայրենիքը փորձադաշտի վերածելու անպտասխանատվությամբ:
Մեր պաշտպանության թիկունքը դավադիր է, որովհետև գործ ունենք երկրի ողնաշարը ջարդող թալանչի իշխանության, հասարակությանը գռփող օլիգարխիայի հետ:
Մեր պաշտպանության թիկունքը դավադիր է, որովհետև Երևանում դեռ զույգ ընտրությունների, ժողովրդավարության և բարոյականության դեմ տարված հաղթանակի խրախճանքն է:
Մեր պաշտպանության թիկունքը դավադիր է, որովհետև անտառի առյուծի գլուխը կորցրած շակալների նման պատրաստվում են մեջ-մեջ անել իշխանությունը:
Մեր պաշտպանության թիկունքը դավադիր է, որովհետև իշխանություն կոչվածը հայրենիքը դարձրել է օտարի պոլիգոն` այն հանձնելով ռուսների խնամակալությանը և տեսանելի ու անտեսանելի դավերին:
Մեր պաշտպանության թիկունքը դավադիր է, որովհետև բովանդակությունը վերածել ենք ձևի, հայրենասիրությունը` կենացի, խաղաղության ձգտումը` հեգնանքի, պատերազմի թեման` PR-ի, անվտանգության հարցը` սելֆիի:
Մինչ Հայաստանի ու Արցախի քաղաքական վերնախավերը ընթրիքային-ֆորում են անցկացնում Ստեփանակերտում` հակառակորդը կրակում է:
Մերոնց արածը ձև է, իրենցը` մաշեցնող պատերազմ:
Երեք գարուն էլ ընդհատվեց….
Ու դարձյալ հիշում ես, որ դա տեղի ունեցավ իշխանություն կոչվածի չընդհատվող խրախճանքի ֆոնին: