«Առաջին լրատվական»-ի զրուցակիցն է Երևան քաղաքի Արաբկիր վարչական շրջանի ղեկավար Հովհաննես Վարդանյանը (Լիդեր):
-Պարոն Վարդանյան, ըստ մամուլի հրապարակումների, չի բացառվում՝ շուտով հրաժեշտ տաք Արաբկիր համայնքի ղեկավարի պաշտոնին, քանի որ Դավիթ Լոքյանը նպատակ ունի որդուն այս համայնքի թաղապետ դարձնել: Որպես ռեյտինգային թեկնածու՝ Դուք խորհրդարանական ընտրություններին ստացել եք 1117 քվե, ՀՅԴ ռեյտինգային թեկնածուներից ամենաշատ ձայնը ստացել է Դավիթ Լոքյանի որդի Սերգեյ Լոքյանը՝ 2 հազար 524 քվե: Դաշնակցական վերնախավը արդյո՞ք քննարկել է Ձեզ հետ այս հարցը:
-Երբևէ նման հարց չի քննարկվել: Կարծում եմ՝ ընդամենը խոսակցություններ են, որոնք իրականությանը չեն համապատասխանում: Ես նշանակվել են համայնքի ղեկավար ՀՀԿ-ՀՅԴ կոալիցիոն հուշագրի շրջանակում: Սա Դաշնակցության պորտֆելն է: Մինչ օրս նման հարց չի քննարկվել, և եթե կուսակցությունը որոշի, որ ես պետք է այլ տեղ լինեմ կամ չլինեմ, միանշանակ պատրաստ եմ ընդունել կուսակցության որոշումը:
-Երբ Ձեզ նոր էին նշանակել համայնքի ղեկավար, չէիք բացառում, որ կանդամագրվեիք կուսակցությանը, քանի որ կիսում եք կուսակցության գաղափարները: Առ այսօր չեք անդամագրվել, ինչո՞ւ: Ի՞նչն է Ձեզ հետ պահում կուսակցական լինելուց:
-Նման խնդիր իմ առջև չի դրվել: Ընդհակառակը, կուսակցության կողմից իմ առջև խնդիր է դրվել աշխատել փոխադարձ վստահության պայմաններում, մինչ օրս այդ վստահությունը կա և կուսակցության շարքերն անցնելու թեմա երբևէ չի քննարկվել:
-Կարծում եք՝ Դաշնակցությունը գո՞հ է Ձեր աշխատանքից:
-Այդ հարցն իրենց պետք է տաք:
-Օրինակ՝ Շիրակի մարզպետի աշխատանքից դժգոհություններ այս ընթացքում չէին հնչում, բայց մարզպետի փոփոխություն տեղի ունեցավ:
-Որոշումը կուսակցությանն է, իմ կողմից կոռեկտ չէ քննարկել այդ թեման:
-Ինչպե՞ս եք գնահատում Ձեր աշխատանքը: Արդյո՞ք 1117 քվեն չի խոսում այն մասին, որ համայնքում չեք կարողացել այնպես աշխատել, որ Ձեզ վստահեն, ձայն տան:
-Գուցե չենք հասցրել: Աշխատանքները, անելիքները շատ են, և կարծում եմ՝ դեռ անելիքներ ունենք, որպեսզի ավելի լավ ճանաչում ձեռք բերենք, ավելի լավ մեր բնակիչների խնդիրներին լուծում տանք:
-Կարծո՞ւմ եք՝ եթե ընտրակաշառք չբաժանվեր, ավելի՞ շատ ձայն կհավաքեիք:
-Ունե՞ք նման փաստեր: Կարծում եմ՝ փաստը մեկ այլ բան է, խնդիրը բարձրաձայնելը՝ մեկ այլ:
-Տարոն Մարգարյանի երդմնակալության օրը Սերժ Սարգսյանը, դիմելով նրան, ասաց. «Տարոն, դու իրավունք չունես մեզ հիասթափեցնելու»։ Դուք ի՞նչ աշխատանքներ պետք է իրականացնեք, որ չհիասթափեցնեք:
-Միանշանակ համաձայն եմ, որ այսօր յուրաքանչյուրս մեր տեղում ավելի շատ պետք է գործով զբաղվենք, քան խոսենք: Եվ Տարոն Մարգարյանն այն քաղաքապետն է, որ բոլոր հույսերը և իր առջև դրված խնդիրները կկատարի:
-Հենց երդմնակալության օրը սելավ էր, և պարզ դարձավ, որ քաղաքապետը իր առջև դրված խնդիրները չի լուծում:
-Դրա պատասխանը տվել է քաղաքապետը խորհրդակցության ժամանակ: Բնական աղետների հետ կապված ոչ ոք ապահովագրված չէ:
-Ձեր համայնքում անսարք վերելակներից ելք կա՞:
-Այո, վերելակների հետ կապված ծրագիր կա: Ծրագիրը լինելու է գլոբալ, և կարծում եմ՝ արդեն քննարկվում է այդ թեման: Այս տարվա ընթացքում ավելի ստույգ պատկեր կունենանք:
-Նախկինում աշխատել եք ոստիկանությունում, ՌՈ-ում, Գլխավոր դատախազությունում: Առաջարկ լինի հին աշխատանքներին վերադառնալու, կհամաձայնվե՞ք:
-Կմտածեմ:
-Ինչո՞ւ են Ձեզ Լիդեր կոչում:
-Պատերազմի ժամանակ դիրքերում ամեն մեկս մեր ծածկանունը պետք է ունենայինք, և ծածկանուններով ամեն մեկս դիմում էինք մյուսին: Իմ մարտական ընկերները ինձ կոչեցին Լիդեր, այդ ծածկանունը դրվեց ինձ վրա:
-Դուք հաշտվո՞ւմ եք այս իրականության հետ:
-Եկեք չքաղաքականացնենք:
-Մի՞թե Դուք չեք զբաղվում քաղաքականությամբ:
-Կարծում եմ՝ իշխանության ներսում ավելին կարող ենք անել, քան միայն դիտորդի դերում լինելը: Ինձ տրված է աշխատելու հնարավորություն, և ես օգտվում եմ այդ հնարավորությունից՝ խոսելու փոխարեն փորձում եմ իմ գործն անել:
-Ձեր նախկին ռոմանտիզմից ի՞նչ է մնացել այսօր: Դեռ նախորդ տարի մեր լրատվամիջոցի հետ զրույցում, անդրադառնալով Ձեր ձեռքի ճկույթ մատը կտրելուն, և ի նշան հավատարմության այն ներկայիս ոստիկանապետ Վլադիմիր Գասպարյանին ուղարկելուն, ասել էիք, որ դա ռոմանտիզմ էր:
-Ես այդ հարցին պատասխանել եմ, խնդրում եմ փակենք այդ թեման, ես այն ժամանակ այդ հարցի պատասխանը տվել եմ:
