Կատարի պետության շուրջ վերջին շաբաթներին առաջացած ճգնաժամը դարձել է ոչ միայն միջազգային, այլև հայկական լրահոսի ամենահետաքրքիր թեմաներից մեկը: Պարսից ծոցի արաբական միապետությունների հակամարտության մեջ հայ փորձագետները տեսնում են ոչ միայն մարտահրավերներ ընդհանուր տարածաշրջանի համար, այլև որոշ քաղաքական և տնտեսական հնարավորություններ, որոնցից կարող է օգտվել նաև Հայաստանը:
Սաուդյան Արաբիայի գլխավորած կոալիցիայի կողմից ենթարկվելով դիվանագիտական, քաղաքական և տնտեսական շրջափակման՝ արաբական այս փոքրիկ, բայց հարուստ պետությունը կանգնել է պարենային լուրջ խնդիրների առջև: Ստեղծված իրավիճակում Կատարին փորձում են օգնել Իրանը, Թուրքիան, որոնք ելնելով իրենց քաղաքական շահերից՝ կատարա-սաուդական դիմակայության մեջ հարում են Կատարի կողմը: Մասնավորապես, Իրանը պարենամթերքով բեռնված մի քանի օդանավ է ուղարկել Կատար:
Տվյալ համատեքտում առավել հատկանշական է այն փաստը, որ Կատարի դեմ սկսված դիվանագիտական դեմարշից օրեր առաջ Հայաստանը պետական մակարդակով քայլեր էր ձեռնարկել՝ Կատարի հետ քաղաքական և տնտեսական հարաբերությունները աշխուժացնելու ուղղությամբ: Հայկական կողմը նույնիսկ վերացրել է Կատարի հետ վիզային ռեժիմը:
Այս իմաստով ԵՊՀ Իրանագիտության ամբիոնի վարիչ, դոցենտ Վարդան Ոսկանյանը կարծում է, որ սա շատ լավ հնարավորություն է հայկական արտադրողների համար, որպեսզի կարողանան իրենց տեղը զբաղեցնել ֆինանսական հսկայական միջոցներ կուտակած Կատարի շուկայում: Մասնավորապես, Հայաստանը կարող է խմելու ջուր արտահանել Կատար:
«Խոսքը վաճառքում առկա խմելու ջրի մասին է: Հաշվի առնելով այս երկրի գնողունակ լինելու հանգամանքը՝ շատ լավ կլիներ, եթե հայկական արտադրողները կարողանային արագ իրենց տեղը գտնել կատարյան շուկայում: Այդ բացը որոշակիորեն լրացրել են իրանական և թուրքական ընկերությունները, բայց կարծում եմ՝ հաշվի առնելով Հայաստանի ունեցած հնարավորությունները՝ մեզ համար էլ ասպարեզ է բացվել, որպեսզի կարողանանք օգտագործել կատարյան շուկան՝ հայաստանյան ապրանքները, հատկապես պարենամթերքը արտահանելու նպատակով: Տեխնիկական իմաստով, կարծում եմ, ճիշտ կլիներ, որպեսզի Կատարում մենք ունենայինք առևտրական ներկայացուցչություն, քանի Հայաստանի ներկայությունը Կատարում ապահովում է ՀՀ դեսպանությունը Արաբական Միացյալ Էմիրություններում, իսկ վերջինս խզել է կապերը Կատարի հետ, հետևաբար Կատարում մեր տնտեսական խնդիրներն առաջ տանելու համար որևէ մարմնի կամ անձի ներկայության կարիք կա»,- «Առաջին լրատվական»-ի հետ զրույցում նշեց իրանագետը:
Արևելագետի կարծիքով՝ այդ հնարավորությունը բավական հրապուրիչ է, բայց շատ կարևոր է նաև գործելու արագությունը, քանի որ մեր հարևան երկրները կարող են շատ արագ զբաղեցնել այդ շուկան. «Անհրաժեշտ է, որպեսզի նախ՝ հստակ գնահատենք իրավիճակը և հետո՝ հնարավորության դեպքում արագորեն քայլեր ձեռնարկենք թե՛ մասնավոր արտադրողների և թե՛ միգուցե նաև պետական մակարդակով»:
Ինչպես նշեց մեր զրուցակիցը, Կատարի ջրի պահանջարկը ծածկող երկրներ շատ կլինեն, պարզապես հայ-կատարական բարձր մակարդակի հարաբերությունների խորապատկերին լավ հնարավորություն կա կատարյան շուկայի մի մասը զբաղեցնելու:
«Սա լուրջ հնարավորություններ կստեղծի մեր տնտեսության զանազան ճյուղերի զարգացման, դրանց ընդլայնման համար»,- ավելացրեց Վարդան Ոսկանյանը:
