ՀՀ վարչապետ Կարեն Կարապետյանը տեղյակ չէ Երևանի քաղաքապետ Տարոն Մարգարյանի եկամտի աղբյուրների մասին։ «Ես չգիտեմ իր եկամտի աղբյուրները և պարտավոր չեմ իմանալ»,- հայտարարել է վարչապետը՝ պատասխանելով լրագրողների հարցերին:
Այսօր տեղի է ունեցել Երևանի քաղաքապետի երդմնակալության արարողությունը, որին մասնակցել է նաև ՀՀ վարչապետ Կարեն Կարապետյանը։
Արարողությանը ներկա լրագրողները վարչապետից հետաքրքրվել են քաղաքապետի ունեցվածքի աղբյուրների մասին՝ նշելով, որ, ըստ ընդդիմադիր գործիչների՝ դրանք կասկածելի ծագում ունեն։
Կարեն Կարապետյանը պատասխանել է, թե փաստեր ունեցողները թող դիմեն համապատասխան մարմիններին։
Հարցին, թե նրան չի՞ զարմացնում, որ երիտասարդ տարիքում Տարոն Մարգարյանն այդքան հարստություն է կուտակել, վարչապետն ասել է. «Ես բազմաթիվ երիտասարդ մարդկանց գիտեմ, որոնք շատ հարուստ մարդիկ են, դա դրա հետ կապ չունի»:
Ի պատասխան լրագրողների այն հարցին, թե իր փորձից ելնելով արդյո՞ք քաղաքապետի աշխատավարձով հնարավոր է հարստանալ՝ վարչապետն ասել է. «Քաղաքապետի աշխատավարձով՝ ոչ»։
