Ֆրանսիայում բացվել են ընտրատեղամասերը խորհրդարանական ընտրությունների առաջին փուլի համար: Այս մասին հայտնում է RIA Novosti-ն:
Ֆրանսիացիները պետք է ավելի քան 7 800 թեկնածուից ընտրեն երկրի Ազգային ժողովի 577 պատգամավորի:
Քվեարկությունը մեկնարկել է Փարիզի ժամանակով 08.00-ին (մեր ժամանակով՝ 10.00), կտևի մինչև 18.00-ն (20.00):
Առաջին փուլում հաղթանակն ապահովված է թեկնածուին, ով կստանա ձայների բացարձակ մեծամասնությունը: Այն ընտրատարածքներում, որտեղ հաղթողը միանգամից պարզ չի դառնա, մեկ շաբաթ անց քվեարկության երկրորդ փուլ կանցկացվի: Հաղթանակի համար բավարար կլինի ձայների պարզ մեծամասնությունը:
Մոտ 67 000 ընտրատեղամասերում անվտանգությունը կապահովի 50 000 ոստիկան և ժանդարմ, նաև Sentinelle գործողության զինծառայողները:
Ipsos/Sopra Steria-ի՝ ուրբաթ հրապարակված հարցման արդյունքներով՝ Ֆրանսիայի նորընտիր նախագահ Էմանուել Մակրոնի ստեղծած «Առաջ, հանրապետություն» շարժումը կարող է ստանալ ընտրողնեորի ձայների 31%-ը: Հետազոտության կանխատեսումներով՝ «Առաջ, հանրապետությունը» կարող է խորհրդարանում ստանալ 397-427 տեղ 577-ից: Հարցման համաձայն՝ «Հանրապետական» կուսակցությունը և նրա դաշնակիցները կհավաքեն ձայների 22%-ը՝ 95-115 տեղ Ազգային ժողովում: «Ազգային ճակատ» կուսակցությունը կարող է ստանալ ընտրողների 17%-ի աջակցությունը՝ 5-15 տեղ: