Facebook սոցցանցի հիմնադիր Մարկ Ցուկերբերգն ամեն տարվա հունվարի սկզբին Facebook-ում հրապարակում է փոստ նոր տարվա իր ծրագրերի մասին:
Որն է նրա նպատակը 2017 թ., գրում է El Mundo-ն:
«Իմ աձնական նպատակն է մինչև տարվա վերջ մարդկանց հետ ծանոթանալ ԱՄՆ բոլոր անկյուններում: Ես շատ ժամանակ եմ անցկացրել շատ նահանգներում, այնպես որ այս տարի պետք կլինի ևս մոտ 30 տեղ այցելել երկրի ամբողջ տարածքը ծածկելու համար»,- գրել էր նա հունվարի 3-ին:
Նա շրջում է ԱՄՆ-ում արդեն 5 ամիս:
ԱՄՆ-ում նրա շրջայցը, որը ֆեյսբուքյան էջերից մեկում ներկայացնում է օրագրերի տեսքով, շշուկների սկիզբ է դրել 2020 կամ 2024 թ. ԱՄՆ նախագահական ընտրություններին Ցուկերբերգի հնարավոր մասնակցության մասին, որոնք նա հերքելու անհաջող փորձ է արել:
2015 թ. նա իր կնոջ հետ հիմնեց բարեգործական կազմակերպություն «լավագույն աշխարհ կառուցելու» նպատակով, որի համար նիրաբերեց Facebook-ի իր բաժնետոմսերի 99%-ը, որոնք գնահատվում են 45 մլրդ դոլար:
«Առայժմ պարզ չէ՝ արդյոք Ցուկերբերգը ձգտո՞ւմ է ԱՄՆ նախագահ դառնալ, բայց լիովին ակնհայտ է, որ նա ուզում է մասնակցել քաղաքական խաղերին»,- կարծում է Օբամայի խորհրդական, Թեդ Քենեդիի, Բիլ Քլինթոնի, Ջոն Քերիի և Հիլարի Քլինթոնի նախընտրական արշավների մասնակից Խուան Վերդեն: «Նրա գործողություններն ուղղված են հասարակական կյանքում հնչողություն առաջացնելուն: Նա ուզում է վստահ լինել, որ անկախ նրանից, թե որ կուսակցությունն իշխանության գլուխ կգա՝ կհասկանա այնպիսի մարդկանց կարևորությունը, ինչպիսին ինքն է»:
Արդյոք ԱՄՆ-ում քաղաքական տիրույթ կգտնվի՞ նրա նման մարդու համար: «Դժվար է ասել: Ցուկերբերգը Սիլիկոնե հովտից տեխնոկրատի դասական մարմնավորում է,- պնդում է քաղաքագետ Ռոջեր Սենսերիչը Կոնեկտիկուտից:- Նա բավականաչափ փող ունի նախընտրական արշավի համար, բայց լրիվ ուրիշ գործ է միջին ամերիկացուն համոզելը, որ իր խնդիրներն իսկապես մտահոգում են Ցուկերբերգին»:
Facebook-ի հիմնադիրը երբեք բացահայտ հանդես չի եկել Դոնալդ Թրամփի դեմ, թեև իր անձնական էջում քննադատել է «այն վախեցած ձայները, որոնք հանդես են գալիս հօոգուտ պատեր կառուցելու և մարդկանց բաժանելու»:
«Թրամփը հաստատակամ է, շիտակ: Նա պոպուլիստ է: Ցուկերբերգը սառն է, շրջահայաց, միայն թվերին է հավատում,- նշում է Սենսերիչը:- Թրամփը Նյու-Յորքի տիպիկ բնակիչ է: Ցուկերբերգը Սան Ֆրանցիսկոյի բնակիչ է: Տարբեր աշխարհներ են»:
Հնարավոր է՝ Մարկը չի ուզում քաղաքական գործիչ դառնալ, որ բիծ չթոնի իր գործարար համբավի վրա՝ ինչպես Բիլ Գեյթսը կամ Ուորեն Բաֆեթը: Բացի դրանից՝ «արդյունաբերական հսկաները և առավելևս այնպիսի խոշոր ընկերության, ինչպիսին Facebook-ն է, պետք է լավ ծածկված թիկունք ունենան քաղաքական առումով»,- նշում է քաղաքագետը:
Ըստ սոցիոլոգ Ալվարո Սանտանա-Ակունյայի՝ Ցուկերբերգի թեկնածության մասին շշուկների փաստը վկայում է հետ-ճշմարտության դարաշրջանում քաղաքական և լրատվական իշխանությունների միջև աճող լարվածության մասին:
Արդյոք Դեմոկրատական կուսակցությունում Ցուկերբերգի համար տեղ կգտնվի՞: «Ես չգիտեմ՝ արդյոք նա կլինի, բայց վստահ եմ, որ դեմոկրատների հաջորդ թեկնածուն կլինի մարդ, ով հիմա հայտնի չէ կուսակցությունում: Կլինի մեկը, ով համակարգից չի գա: Մարդկանց թարմ կադրեր են պետք»,- համոզված է Վերդեն: