Մեր տրամադրության տակ է անցյալ ամիս ԱՄՆ-ում բացահայտված հանցախմբի նկատմամբ ԱՄՆ դատախազության կազմած քրեական գործը, որի հիման վրա հարուցվել է հայտնի քրեական գործը՝ Արմեն Ղազարյանի եւ մյուսների նկատմամբ։ Ըստ այդմ, Միրզոյան-Թերջանյանի և օրենքով գող Արմեն Ղազարյանի (Պզո, Քերոբ մականունով) ղեկավարությամբ խմբավորումն ամուր կապեր է ունեցել Հայաստանում: Խմբի անդամների եւ աջակիցների մեծ մասը կա՛մ ազգությամբ հայ է, կա՛մ նախկին ԽՍՀՄ-ից ներգաղթյալ, ովքեր այս կամ այն կերպ կապված են եղել Հայաստանի հետ։ Այդ թվում պարբերաբար այցելել են Հայաստան, հանցավոր կապերի մեջ են եղել հայաստանաբնակ անհատների հետ, հանցավոր հասույթը՝ փոխանցել Հայաստան, այդ հասույթի եկամուտների հաշվին Հայաստանում եւ ԱՄՆ-ում ձեռք բերել անշարժ գույք և այլ ակտիվներ։ Նույն միջոցներով նրանք ձեռք են բերել բիզնեսներ Հայաստանում։
Ներկայացնում ենք քրեական գործից մի դրվագ:
Միացյալ Նահանգներում և արտասահմանում գործող այլ հանցավորների հետ վեճերը լուծելիս կազմակերպության անդամներն ու դրան հարողներն օգտվում էին օրենքով գող Ղազարյանի աջակցությունից: Օրինակ` 2006 թ. դեկտեմբերին Ղազարյանը մեկնել է Նյու Յորք` օգնելու Ամրոյանին ու նրա գործընկերոջը, երբ արտասահմանյան ներդրումների խարդախման ծրագիր իրականացնող ոմն մեկը՝ մեկ այլ օրենքով գողի ներկայացուցիչ, հավակնում էր Ամրոյանի ընկերոջից ստանալ $200, 000: Մյուս օրենքով գողի հետ խոսելուց հետո Ղազարյանը վճռում է, որ $200, 000-ը, որ Ամրոյանի ընկերը ենթադրաբար պարտք էր, կջնջվի: Հավանաբար 2006 թ. դեկտեմբեր և 2007 թ. հունվար ամիսներին $200, 000 պարտքի կապակցությամբ Ամրոյանին օժանդակելուց հետո Ղազարյանը պահանջում է մոտ $100, 000 տուրք՝ իր ծառայության դիմաց: Ամրոյանը չի վճարում Ղազարյանին` իրեն սնանկ հայտարարելով, և արդյունքում արտաքսվում է «Միրզոյան-Թերջանյան» կազմակերպության շարքերից: Մոտավորապես 2010 թ. օգոստոսին Ղազարյանն Ավետիսյանին հրահանգում է՝ ի պատասխան զավթել Ամրոյանի գնած նավը: