Օպերայի և բալետի ազգային ակադեմիական թատրոնում երեկ տապալվեց Ա. Խաչատրյանի «Գայանե» բալետի ներկայացումը, որը նվիրվում էր բալետի ստեղծման և առաջնախաղի 75-ամյակին։
Չնայած լեփ-լեցուն դահլիճին, արտասահմանից ժամանած հյուրերին՝ նավագախումբը վերջին պահին որոշել է չնվագել, բալետի դերասաններն էլ բեմում են եղել, տեսել են՝ նվագախումբը չի նվագում, իրենք էլ լքել են բեմը։ Բալետի դերասանները, մեր տեղեկություններով, նվագախմբի որոշմանը նախապես ծանոթ չեն եղել, և իրենց համար էլ է անակնկալ եղել։
Բարձրախոսով հայերեն հայտարարվել է, որ տեխնիկական խնդիրների պատճառով ներկայացումը հետաձգվում է, հյուրերը սկսել են լքել դահլիճը։ Ընդ որում, մեր աղբյուրը պատմում է՝ քանի որ հայտարարվել է միայն հայերեն, ներկա արտասահմանցի հանդիսատեսները չեն հասկացել, թե ինչ է կատարվում, ինչու են բոլորը լքում դահլիճը, մտածել են՝ ահաբեկչություն է, և խուճապահար հեռացել։
Օպերայի և բալետի ազգային ակադեմիական թատրոնի հանրային կապերի բաժինը արդեն հայտարարել է, որ վաճառված բոլոր տոմսերի գումարները կվերադարձվեն։ Նաև նշվում է, թե բոյկոտի կազմակերպիչներն աշխատանքից կրճատված 10 աշխատակիցներն են։
Ընդգծենք, որ տեսականորեն այդ ինֆորմացիան համապատասխանում է իրականությանը, սակայն խնդիրը միայն այդ 10 աշխատակիցները չեն։ Այն բանից հետո, երբ թատրոնի տնօրեն Անդրանիկ Արզումանյանը նշանակվել է մշակույթի նախարար Արմեն Ամիրյանի խորհրդական, Ազգային ակադեմիական թատրոնի գեղարվեստական ղեկավար Կոնստանտին Օրբելյանը նշանակվել է նաև տնօրեն՝ փաստորեն համատեղությամբ զբաղեցնելով Արզումանյանի պաշտոնը, ինչը նման մեծ թատրոնի համար բավականին դժվար է։
Կարելի է ասել, որ թատրոնն այժմ տնօրեն կամ ղեկավար, որպես այդպիսին, չունի, և երեկ էլ վերջին պահին, երբ նվագախումբը հրաժարվել է նվագել, ոչ ոք չի եղել, որ նրանց հակառակը պարտադրի։ Խնդիրը բնավ Կոնստանտին Օրբելյանը չէ, որը շատ հարգված և սիրված է աշխատակիցների կողմից, պարզապես վերջինիս համար բավականին դժվար է համակարգել ողջ աշխատանքը՝ կատարել և՛ գեղարվեստական ղեկավարի, և՛ տնօրենի պարտականություններ։ Արդյունքում՝ աշխատանքից ազատվում կամ ընդունվում են մարդիկ, առաջանում են ներքին տարաձայնություններ, դժգոհություններ, այսօրինակ բոյկոտներ, որոնք կառավարելը մեկ հոգու համար անհնար է դառնում։