Հունիսի 5-ին Վազգեն Սարգսյանի անվան «Հանրապետական» մարզադաշտում Հայաստան-Սենտ Քիթս և Նևիս ընկերական հանդիպմանը ականատես եղանք ցավալի մի փաստի: Մեր հավաքականին աջակցելու էր եկել ընդամենը 4-5 հազար ֆուտբոլասեր: ՀՖՖ-ն այս հանդիպման տոմսերի արժեքը սահմանել էր 2-5 հազար դրամ՝ պաշտոնական հանդիպումներից երկու անգամ ավելի էժան: Եթե հաշվի առնենք, որ ՀՖՖ-ն որոշակի քանակության տոմսեր բաժանում է, այսպես կոչված, լավ ախպերներին ու ընկերներին, ապա կստացվի, որ խաղին ներկա են գտնվել 2-3 հազար իրական երկրպագուներ:
Ինչ խոսք, մրցակիցը չափազանց թույլ էր, անհայտ և շատերի կողմից ստացել էր Կարիբյան ծովի «պիրատների» հավաքական որակավորումը: Հանդիպումը հետաքրքրություն չէր առաջացնում նաև մարզական առումով, բայց… Հայաստանի ազգային հավաքականում խաղում է Եվրոպայի լավագույն կիսապաշտպաններից մեկը՝ Հենրիխ Մխիթարյանը: Նա միլիոնավոր երկրպագուների կուռքն է, նրա հանդիպումները դիտելու համար Մանչեսթեր են մեկնում հազարավոր երկրպագուներ: Սոցիալական ցանցերում Մխիթարյանին վերաբերող հրապարակումները դիտում են հարյուր հազարավոր հայ օգտատերեր:
Հայաստանցի երկրպագուի համար Մխիթարյանի խաղով հիանալու ավելի լավ առիթ, քան կայացած ընկերական հանդիպումն էր, դժվար է պատկերացնել: Բայց արի ու տես, որ հայաստանցի երկրպագուն մարզադաշտ չեկավ, և տոմսերի գների թանկ լինելու վերաբերյալ բոյկոտն ի վերջո կայացավ: Բոյկոտ, որը ամենևին էլ կազմակերպված չէր: Շատ երկրպագուներ նախընտրեցին Հայաստան-Սենտ Քիթս և Նևիս հանդիպումը դիտել, այսպես կոչված, փաբերում, սպորտային բարերում՝ մի գավաթ գարեջրի և այլ ըմպելիքների ընկերակցությամբ:
Երկրպագույն այլևս չի ցանկանում տոմս գնել անհավանական բարձր գներով: Մարդիկ հոգնել են ՀՖՖ-ի վարած, մեղմ ասած, ոչ այնքան կառուցողական քաղաքականությունից: Ամենաշատը վախենում էինք, որ երկրպագուն մի օր երես կթեքի հավաքականից: Ցավալի է, բայց ըստ էության դա տեղի ունեցավ:
«Այսօրվա հավաքականի խաղին մինչև հիմա վաճառված (բաժանված) մոտ 10-15% տոմսերի ցուցանիշին ի՞նչ բացատրություն կա: Հասկացանք՝ խաղում ենք պիրատների, ձկնորսների կամ կիսասիրողականների հետ, բայց նենց էլ չի՝ մերոնք գելուգազան են, բոյկոտը չի, տոմսերի գները չեն՝ ընկերականին 50% էժան են… ֆեդերացիայի վատ աշխատանքը չի… իրանք միշտ էլ վատ են աշխատում ստադիոն լցնելու ուղղությամբ, որ եվրոպական ինչ-որ առաջնության խաղի գովազդ ավելի շատ կարաս հանդիպես քաղաքում՝ նորություն չի… Հիմա ամենաանհասկանալին՝ Հենոյի ֆակտորը… «Մանչեսթերի» խաղերին սաղ ազգը բալետ ա անում.. Հարց ա առաջանում՝ հիմա Հայաստանի՞, «Մանչեսթերի՞», թե՞ Հենոյի ֆաներն ենք, թե՞ TV ֆաներն ենք… Հենոն խաղալու է էսօր: Հենոյի մասին վավերագրական ֆիլմ են նկարում Մանչեսթերից ժամանած անձնակազմով… «Մանչեսթերի» խաղին 80-90 000 մարդ ա գնում, հաստատ զարմացած են մնալու՝ տեսնելով Հայաստանի, Հենոյի խաղին 3-4000 մարդ»,- Հայաստան-Սենտ Քիթս և Նևիս հանդիպումից ժամեր առաջ ֆեյսբուքյան իր էջում գրել էր երկրպագուների «Առաջին ճակատ» շարժման հիմնադիր անդամ Սերգեյ Ջանջոյանը:
Նշենք, որ ողջ հանդիպման ընթացքում հատկապես հուսիսային տրիբունայում գտնվող ՖԱՖ-ը ակտիվորեն աջակցում էր Հայաստանի ազգային հավաքականին: Արևելյան և արևմտյան տրիբունաներում գտնվող երկրպագուները հազվադեպ էին ոգևորում մեր հավաքականին, որը իր պատմության մեջ Երևանում ամենախոշոր հաշվով հաղթանակը տարավ:
Իրականում հավաքականը երկրպագուից հեռացնելու այս քաղաքականությունը կարող է էլ ավելի դառը հետևանքներ ունենալ: Ապրում ենք աղքատ և սոցիալապես խայտառակ վիճակում գտնվող մի երկրում: Հասկանալ է հարկավոր, որ 5 հազար դրամը ազգաբնակչության 80 տոկոսի համար փոքր գումար չէ: Մարդկանց զգալի մասը չի կարող իրեն թույլ տալ ազգային թիմի խաղը դիտելու համար նույնիսկ 2 հազար դրամ վճարել: Ֆուտբոլն առանց երկրպագուների ֆուտբոլ չէ: Երկրպագուներին կարելի է չսիրել, չընդունել նրանց դիտարկումները, բայց նրան ֆուտբոլից զրկելը ոչ այլ ինչ է, քան ստորություն: