Հանրապետությունում այսօր՝ հունիսի 6-ին, մեկնարկել են «Հայոց լեզու և գրականություն» առարկայի միասնական քննությունները։ Քննություններին այսօր մասնակցում է շուրջ հինգ հազար դիմորդ, գործում է 29 քննական կենտրոն։
Հայաստանի պետական տնտեսագիտական համալսարանում տեղակայված քննական կենտրոնում քննություն էր տալիս 160 դիմորդ, որոնցից 10 դիմորդ քննությանը չէր ներկայացել։
«Այսինքն՝ այսօր մեզ մոտ քննություն է հանձնում 150 աշակերտ, իսկ թե ինչու է այդ տասը դիմորդը բացակայում քննությունից՝ ես չեմ կարող ասել։ Բացակայությունը յուրաքանչյուր երեխայի խնդիրն է, այսինքն՝ գուցե հիվանդ են կամ ինչ-ինչ հոգեբանական խնդիրներ ունեն, կամ պարզապես չեն ցանկացել գալ քննության, այսինքն՝ քննությունը, որպես էդպիսին, բավականին լարված պրոցես է, բայց որպեսզի նրանք ներկայանան հաջորդ փուլին, պետք է հիմնավորված փաստաթուղթ ներկայացնեն այս քննությանը չներկայանալու մասին, այնուհետև հունիսի 24-30-ը դիմում գրեն ԳԹԿ-ում, որպեսզի կարողանան երկրորդ փուլին մասնակցել։
Իսկ այսօր հանձնողներին մաղթում եմ, որպեսզի կարողանան կենտրոնանալ, իրենց կամային հատկանիշները լավագույնս դրսևորեն իրենց այսօրվա աշխատանքում և բարձր միավորներ հավաքեն»,- «Առաջին լրատվական»-ի հետ զրույցում նշեց ՀՊՏՀ միասնական քննական կենտրոնի ղեկավար Լիլիթ Սաֆարյանը։
Իսկ հարևան սենյակում մոնիտորների միջոցով քննության ընթացքին էին հետևում ծնողները՝ ոմանք լարված, ոմանք էլ վստահ իրենց երեխաների գիտելիքներին։ Մեզ հետ զրույցում նրանք որևէ դժգոհություն չհայտնեցին քննության ընթացքի հետ կապված, արտառոց միջադեպեր չեն արձանագրվել։
Իսկ դիմորդները հավատացած էին, որ շատ լավ են պատրաստվել։ Քննությունից հետո նրանք վստահեցնում էին, որ 17, 18 կամ 19 միավոր են հավաքելու, իսկ թեստերն էլ ըստ նրանց՝ միջին բարդության են։ Դիմորդների խոսքերով՝ որևէ մեկի նկատմամբ հանձնաժողովի անդամների կողմից կողմնապահություն չեն նկատել։
Այս տարվա դիմորդները ուզում են ընդունվել ԵՊՀ, Վալերի Բրյուսովի անվան լեզվահասարակագիտական համալսարան, ՀՊՏՀ, Խաչատուր Աբովյանի անվան մանկավարժական ինստիտուտ և այլ պետական բուհեր։
Մանրամասները՝ տեսանյութում։