Հայաստանը և Եվրամիությունը բանակցում են նոր փաստաթղթի շուրջ. ՀՀ-ում ԵՄ դեսպան Սվիտալսկին հայտարարել է, որ փաստաթղթի ստորագրման թիրախային ամսաթիվը նոյեմբերն է:
«Առաջին լրատվական»-ի հետ թեմայի շուրջ զրույցում «Բաց հասարակություն հիմնադրամներ-Հայաստան» գրասենյակի գործադիր տնօրեն Լարիսա Մինասյանն անդրադառնալով հարցին, թե Հայաստանը վերջին պահին, ինչպես 2013-ին, հետ չի՞ կանգնի և արդյո՞ք կստորագրի փաստաթուղթը, նշեց, որ դժվարանում է պատասխանել այդ հարցին, քանի որ, ըստ նրա, դրա համար պետք է բավականաչափ տեղեկատվություն այն մասին, թե ինչ է կատարվում, և թե ինչ դրդապատճառներից ելնելով նախորդ անգամ չստորագրվեց Ասոցացման համաձայնագիրը:
«Թե՛ այն ժամանակ, թե՛ նաև հիմա Հայաստանի պաշտոնյաների կողմից միտում չկա չստորագրելու»,- նշեց Լ. Մինասյանը:
Նրա խոսքով՝ չստորագրելը կունենա լուրջ հետևանքներ մեր երկրի հեղինակության, ինքնիշխանության համար: «Դա ցույց կտա որպես երկիր տրված խոստումը կատարելու անկարողությունը: Տխուր կլինի Հայաստանի համար, եթե նորից չստորագրենք Հայաստան-ԵՄ համաձայնագիրը»,- ընդգծեց Լարիսա Մինասյանը: