Կին կոնգրեսական Ջեկի Սփեյերն ԱՄՆ-ի ամենաազդեցիկ կին քաղաքական գործիչներից մեկն է։ Նա ծնվել է 1950 թվականին, Սան Ֆրանցիսկոյում։
Ջեկիի մայրը՝ Նենսի Կանչելյանը, մեծացել է հայաշատ ամերիկյան Ֆրեզնո քաղաքում, որտեղ նրա ծնողները գաղթել էին Թուրքիայից՝ Հայոց ցեղասպանության տարիներին։ Ապագա կոնգրեսականի հայրը եղել է ծնունդով Գերմանիայից։
Սփեյերը բարձրագույն իրավաբանական կրթություն է ստացել Դեյվիսի կալիֆորնիական համալսարանում, իսկ քաղաքական կարիերան սկսել է 1970-ական թվականներին՝ Կալիֆորնիա նահանգից դեմոկրատ կոնգրեսական Լեո Ռայանի թիմում` հայտնում է rusarminfo.ru-ն
1978 թվականին երիտասարդ կինը պաշարման մեջ էր հայտնվել, որը պատրաստել էր ամերիկյան «Ժողովուրդների տաճար» աղանդը Ջորջթաունում, որտեղ նա գործընկերների հետ գտնվում էր այդ կազմակերպության գործունեության հետաքննման գործով։ Հարձակման հետևանքով Սփեյերը 5 վնասվածքներ էր ստացել։ Երկու տարի անց նա ընտրվել է Սան-Մատեո շրջանից Կալիֆորնիայի օրենսդիր ժողովի անդամ, իսկ 1998 թվականին դարձել է նահանգի սենատոր։
2008 թվականին Սփեյերը դարձել է Կալիֆորնիայի 12-րդ շրջանից ԱՄՆ Ներկայացուցիչերի պալատի անդամ և զբաղեցնում է այդ պաշտոնն առ այսօր։ 2012 թվականին ամերիկյան Newsweek պարբերականը նրա անունը ներառել է ԱՄՆ-ի «Ամենախիզախ կանանց ցուցակում»՝ իրավապաշտպան գործունեության համար։
Նա հայկական արմատներով ԱՄՆ Կոնգրեսի միակ կին անդամն է։
«Վաղ տարիքից մայրս ինձ փոխանցել էր Հայոց ցեղասպանության ճանաչման կարևորության գաղափարը։ Ես մտադիր եմ ասել ճշմարտությունը՝ որտեղ էլ գտնվեմ։ Բոլոր երկրները, այդ թվում և ԱՄՆ-ը, պետք է լիովին ճանաչեն այդ ողբերգությունը»,-ասել էր Սփեյերը 2015 թվականին իր հարցազրույցներից մեկում։
2015 թվականին կոնգրեսականը ժամանել էր Հայաստան և մասնակցել Հայոց ցեղասպանության 100-րդ տարելիցի միջոցառումներին։
