«Ցանկացած ծառայությունից օնլայն տարբերակով օգտվելը դիտարկվում է որպես ավելի արդյունավետ և ավելի էժան միջոց, այսինքն՝ եթե խնդիրն այս տեսանկյունից ենք դիտարկում, ապա օնլայն ծառայությունների տեսակարար կշիռը մեր հասարակության մեջ ցանկացած բնագավառում աճելու միտում ունի, և օնլայն խաղադրույքներ անելն էլ բացառություն չէ։
Եթե հարցը կապում ենք հասարակության աղքատության, գործազրկության և վատ պայմանների հետ, ապա նախ հասարակությունը ինքն է ընտրում՝ ինչով զբաղվի, բայց մյուս կողմից էլ սովորաբար նման հասարակությունների մեջ առաջանում են նման տիպի կառույցներ, որովհետև վերջիններս հաջողության պահանջմունքը բավարարելու խնդիր ունեն։ Երբ որ մարդը գործում անհաջողակ է, իր աշխատանքի մեջ պրոգրես չի կարողանում ապահովել, ընտանիքում որոշակի անհաջողություններ կան և այլն, ապա այդպիսի բաները մարդկանց մղում են որոշակի բացասական քայլերի։ Այդ բացասական քայլերից մեկն էլ խաղերի մոլուցքով տառապելն է և, իհարկե, սա թե հոգեբանական պրոբլեմ է, թե կառավարման խնդիր»,- «Առաջին լրատվական»-ի հետ զրույցում շեշտեց տնտեսագետ Վիլեն Խաչատրյանը՝ անդրադառնալով Հայաստանում բուքմեյքերական ընկերությունների, օնլայն խաղադրույքներ իրականացնող կազմակերպությունների, խաղատների իրականացրած գործունեությանն ու դրանց թվի աճին՝ համադրելով այդ փաստը մեր տնտեսության ներկայիս վիճակի հետ։
Ըստ տնտեսագետի՝ եթե մարդը գոնե մի անգամ խաղատանը հաջողության է հասել, ապա դա նրան այսպես ասած՝ առավելագույն հաջողությունների հասնելու կամ դա բոլորին պատմելու առիթ է նաև տալիս, և «ձեռք բերված հաջողությունը» նրան ստիպում է ընկնել կախվածության մեջ ու խաղատներում փնտրել իր կյանքի համար հաջողություններ կամ ինչ-որ նմանատիպ բաներ։
«Խաղատները համաշխարհային պրակտիկայում ընդունված են որպես եկամուտները կամ փողերը լվանալու համար ձևավորված օբյեկտներ, այսինքն՝ եկամուտները թաքցնելու համար կիրառում են նաև այսպիսի միջոցներ։
Տնտեսագիտության մեջ այդպիսի հաշվարկ կա, որ նման միջոցներով, այսինքն՝ երբ քեզանից ավելի շատ տանում են, քան դու իրականում շահում ես, այդ ձևով միջին վիճակագրական քաղաքացին միշտ պարտված է, և պետք է հասկանալ, որ նման մոտեցումներով կյանքի իրավիճակը փոխել հնարավոր չէ»,- նկատեց տնտեսագետն ու հավելեց, որ դա իրենից ներկայացնում է անառողջ հասարակության ձևավորման մոդել։
Խաղատների ցանկում ամենախոշորն ու ոլորտում գերիշխող դիրք զբաղեցնողը «Օնիրա Քլաբ» ՍՊԸ-ն է, որը, ըստ մամուլի հրապարակումների, պատկանում է ԲՀԿ առաջնորդ Գագիկ Ծառուկյանին, իսկ խաղատան անվանումն է «Շանգրի Լա»։
«Օնիրա Քլաբ»-ը, 2016 թ. հունվար-դեկտեմբեր ամիսների կտրվածքով, Հայաստանի 1000 խոշոր հարկատուների ցուցակում զբաղեցնում է 28-րդ տեղը՝ իր վճարած 4․7 միլիարդ դրամ հարկով։ «Ռոյալ Ինթերթեյմենտ» ՍՊԸ-ն նույն ժամանակահատվածում զբաղեցրել է 429-րդ տեղը՝ իր վճարած 274 միլիոն դրամ հարկով: «Սենատոր Սպորտ» ՍՊԸ-ն 655-րդ տեղում է՝ վճարած 166 միլիոն դրամ հարկով, իսկ «Լիմոն Գեյմս», «Նևադա» եւ «Վալկան» ՍՊԸ-ները չկան խոշոր հարկատուների ցանկում:
Ինչ վերաբերում է այն հանգամանքին, որ խոշոր խաղատներից շատերը ավելի մեծ եկամուտներ են ստանում, քան հարկեր են վճարում , ապա, Վիլեն Խաչատրյանի գնահատմամբ, առհասարակ, այստեղ լուրջ աշխատանք ունեն իրականացնելու հարկային մարմինները։
«Անգամ այդ ամենը կանոնակարգելու դեպքում, միևնույն է, մի դելտա տոկոս կմնա, որը կլինի չկանոնակարգված կամ անկառավարելի»,- եզրափակեց նա։
Մանրամասները՝ տեսանյութում։