Ազգային ժողովի անդրանիկ նիստում Սերժ Սարգսյանը ներկայացրեց, թե 2040 թվականին ինչ պատկեր կունենա Հայաստանը, որ բնակչությունը կլինի 4 մլն, սոցիալական բեռը կթեթևանա։ Պատմական գիտությունների թեկնածու, ժողովրդագետ Արտակ Մարկոսյանից «Առաջին լրատվական»-ը հետաքրքրվել է, թե որքանով է իրատեսական այս գնահատականը: Ժողովրդագետը ներկայացնում է ՄԱԿ-ի Բնակչության հիմնադրամի տվյալները, ըստ որոնց՝ 2050 թվականին Հայաստանի բնակչության թվաքանակի երկու կանխատեսում կա. Լավագույն տարբերակով՝ Հայաստանում կլինի 3․2 միլիոն ազգաբնակչություն, վատագույն պարագայում՝ 2 միլիոն: Իսկ թե ինչ կլինի 2040-ին, ըստ ժողովրդագետի, կախված է երկու գործոնից. առաջին՝ Հայաստանում մենք ունենք դեռևս շարժունակ բնակչություն, արտագաղթը չի դադարում, 2009-ից հետո այն կայուն աճման միտում է դրսևորվում, իսկ շարունակվող արտագաղթի պարագայում խոսել բնակչության թվաքանակի ավելացման մասին, ռեալ չէ:
«1986-ին Հայաստանում ծնվել է 81.200 երեխա: Սա է եղել ծնելիության պիկը, մինչև 1991թվականը բավական բարձր էր, անկախությունից հետո ծնելիությունն անկում ապրեց»,- ասաց Արտակ Մարկոսյանը:
2017-ի առաջին եռամյսակում, նրա խոսքերով՝ տեղի է ունեցել ծնելիության կտրուկ անկում, վերջին 25 տարվա ժողովրդագրական դիտարկումների ամենացածր բնական աճը: