Հունիսի մեկին՝ երեխաների իրավունքների պաշտպանության օրվա առթիվ, Նոր Խարբերդի մասնագիտացված մանկատան սաները մեծ ոգևորությամբ սպասում էին հրավիրված հյուրերին: Երեխաները ջանասիրաբար պատրաստվել էին յուրօրինակ հանդիսական արարողությանը և իրենց երգերով ու պարերով պոզիտիվ տրամադրություն փոխանցեցին հանդիսատեսին:
Մանկատանը տիրում էր համերաշխություն ու ներդաշնակություն՝ շրջապատված ջերմ մթնոլորտով և անձնակազմի պրոֆեսիոնալ մոտեցմամբ:
Տոնական տրամադրությունն ավելի բարձրացավ, երբ մանկատան սաները հանդիպեցին «Chipsella 3D» ընկերության կողմից հրավիրված հատուկ հյուրին՝ սիրված հումորիստ, դերասան Վաչե Թովմասյանին:
«Միանշանակ դրական եմ գնահատում նման միջոցառումները, քանի որ երեխաներ են, մանավանդ սահմանափակ կարողություններով. իրենց համար, կարծում եմ, որ սա շատ ուրախալի պահ է: Իհարկե, հեշտ չէ գալ ու տեսնել նրանց, մանավանդ երբ դու ունես երեխա. մի փոքր ծանր ես տանում, բայց դա ոչինչ է այն ծանրության ու դժվարության դեմ, որ հաղթահարում են այս երեխաներն ամեն օր: Կարծում եմ, որ եթե յուրաքանչյուրս կարողանանք մի փոքր ժամանակ և ուշադրություն ցուցաբերել, ուրիշ բանի կարիք նրանք չեն ունենա»,- այսպիսի մեկնաբանություն տվեց Վաչե Թովմասյանը:
«Chipsella 3D» ընկերությունը երեխաների համար նախապատրաստել էին հետաքրքիր անակնկալներ ու նվերներ: Ընկերությունը տնօրեն Խաչիկ Գրիգորյանը մեծ ոգևորությամբ պատասխանեց մեր հարցերին. ««Chipsella 3D» ընկերությունը միշտ պատրաստ է երեխաների միջազգային օրվա առթիվ լինել երեխաների կողքին և ոչ միայն այս տոն օրին, ընդհանրապես մենք միշտ պատրաստ ենք օգնել երեխաներին: Շնորհավորում ենք մեր սիրելի երեխաներին այս տոնի առթիվ և մաղթում ենք անհոգ մանկություն»:
1953թ. Ստեղված Նոր Խարբերդի մասնագիտացված մանկատունը, որպես սոցիալ-բուժառողջապահական հաստատություն, զբաղվում է կենտրոնական նյարդային համակարգի օրգանական և ֆունկցիոնալ ախտահարումներով բնածին ու ձեռքբերովի ֆիզիկական և մտավոր արատներ ունեցող 6-18 տարեկան հաշմանդամ երեխաների խնամքով: