Այսօր Հայաստանում կնշվի ԱՄՆ Խաղաղության կորպուսի՝ Հայաստանում գործունեության 25-ամյակը: Այսօր նաև տեղի կունենա Խաղաղության կորպուսի 25-րդ խմբի կամավորների երդման արարողությունը:
ԱՄՆ Խաղաղության կորպուսի հայաստանյան գրաենյակի տնօրեն Չարլզ Էնսիսոն լրագրողների հետ զրույցում նշեց, որ կամավորների նոր խումբը բաղկացած է 42 ամերիկացիներից և հավելեց, որ մինչ օրս Հայաստանում եղել են 990 կամավորներ, այսօր 1000-րդ կամավորը կմասնակցի երդման արարողությանը:
Չարլզ Էնսիսոյի խոսքով՝ ԱՄՆ խաղաղության կորպուսի հիմնական նպատակը աշխարհում խաղաղություն սերմանելն է. «Յուրաքանչյուր երկրում խաղաղության կորպուսը տարբեր խնդիրներ է լուծում, Հայաստանում պետք է աշխատենք երիտասարդների հետ, ինչպես նաև դպրոցներում անգլերենի դասավանդման հարցում օգնենք»:
Հարցին՝ ինչպե՞ս են ընտրվում այն ընտանիքները, որտեղ հյուրընկալվում են կամավորները, Չ. Էնսիսոն պատասխանեց, որ Հայաստանի տարբեր մարզերում, գյուղերում ընտանիքները դիմում են, որպեսզի հյուրընկալեն կամավորի. «Հիմնական պայմանն այն է, որ ընտանիքը պետք է լինի ջերմ, փորձի օգնել կամավորին, որպեսզի նա հեշտությամբ ինտեգրվի գյուղում կամ քաղաքում և օգնի կամավորին՝ իր առաքելությունը հաջողությամբ կատարել Հայաստանում»:
Չ. Էնսիսոն հավաստիացրեց, որ կամավորները առաքելությունն իրականացնելուց հետո Հայաստանից հեռանալիս ասում են, որ կկարոտեն իրենց հյուրընկալած հայ ընտանիքներին:
Մանրամասները՝ տեսանյութում:
