Այսօր Առնո Բաբաջանյանի անվան ֆիլհարմոնիայի փոքր դահլիճում տեղի կունենա Խաղաղության կորպուսի նոր խմբի կամավորների երդման հանդիսավոր արարողությունը: Միջոցառումմից առաջ լրագրողների հետ զրույցում Հայաստանում ԱՄՆ դեսպան Ռիչարդ Միլսը նշեց. «Այսօր առանձնահատուկ օր է ինձ համար, դեսպանության և Խաղաղության կորպուսի համար, կարծում եմ նաև Հայաստանի ժողովրդի համար:
Այսօր տեղի կունենա նոր՝ 25-րդ խմբի երդմնակալության արարողությունը, և նրանք կսկսեն իրենց ծառայությունը Հայաստանի Խաղաղության կորպուսում՝ երկու տարի ժամկետով:
Այսօր մենք նաև նշում ենք հոբելյան՝ Խաղաղության կորպուսի գործունեության 25-ամյակն է նշվում Հայաստանում:
Այսօր երդվելու է նաև ԱՄՆ-ից ժամանած 1000-րդ կամավորը, ով աշխատելու և ծառայելու է Հայաստանում: Ուստի այս օրը հիշարժան է մեզ՝ բոլորիս համար»:
Դեսպանի խոսքով՝ Խաղաղության կորպուսի ծրագիրը երկու ուղղությամբ է աշխատում՝ այստեղ են ժամանում տարբեր տարիքի՝ երիտասարդ և տարիքով կամավորներ, և նրանք Հայաստանում ծանոթանում են այստեղի մշակույթին, կյանքին, առանձնահատկություններին, և, վերադառնալով ԱՄՆ, նրանք այդ ամենը ներկայացնում են, և ԱՄՆ-ում ձևավորվում է այն շրջանակը, որը ՀՀ-ի և ԱՄՆ-ի միջև հարաբերությունների ամրապնդման դիրքերից է հանդես գալիս:
«Այսօր այս առիթը նշանավորելու համար մեզ է միացել նաև Վաշինգտոնի Խաղաղության կորպուսի գրասենյակի տնօրենը, և նա այստեղ հանդիպումներ կունենա կամավորների, պետական պաշտոնյաների հետ, քանի որ մենք պատրաստվում ենք շարունակել խաղաղության կորպուսի գործունեությունը նաև առաջիկա տարիներին, առաջիկա տասնամյակներին. գործունեություն, որը մեր երկու երկրների միջև կամուրջներ ձևավորելուն է միտված»,- եզրափակեց դեսպանը:
