Ադրբեջանցի ընդդիմադիր լրագրող Աֆղան Մուխթարլիի` մայիսի 29-ին Թբիլիսիում տեղի ունեցած առևանգումն արդեն մի քանի օր է բուռն քննարկումների կիզակետում է։
Հայտնի է, որ Մուխթարլին երկու տարի առաջ է տեղափոխվել Վրաստան՝ Ադրբեջանում լրագրողների և իրավապաշտպանների նկատմամբ համատարած ճնշումների պատճառով։
Տեղեկացանք, որ այսօր Թբիլիսիում երկու բողոքի ակցիա է տեղի ունեցել։ Ակցիայի մասնակիցները Մուխթարլիի առևանգումը կապում են «Վրաստանի և Ադրբեջանի իշխանությունների հանցավոր համագործակցության հետ»։
Վրաստանի ընդդիմադիր «Միացյալ ազգային շարժում» կուսակցության անդամները պաշտպանում են բողոքի ակցիայի մասնակիցների բարձրացրած մտահոգությունը՝ ընդգծելով, որ Մուխթարլիի առևանգումը չէր կարող տեղի ունենալ առանց Վրաստանի իշխանությունների և Հատուկ ծառայությունների իմացության։
«Առաջին լրատվական»-ի հետ զրույցում գործն ուսումնասիրող վրացական «Ալիք մեդիա» կայքի հայկական բաժնի լրագրող Նորայր Գասպարյանը ներկայացրեց որոշ մանրամասներ։ Ասաց, որ բողոքի ակցիան այսօր նախաձեռնել էր Վրաստանի լրագրողական էթիկայի կազմակերպությունը՝ մեկը ԱԱԾ-ի, մյուսը՝ կառավարության մոտ. «Նրա կինը, որոշ լրագրողներ մեղադրում են Վրաստանի հատուկ ծառայություններին Ադրբեջանի հատուկ ծառայությունների հետ համագործակցելու մեջ։ Մուխթարլիի փաստաբանը հայտարարել է, որ ՄԻԵԴ է ներկայցվելու երկու հայց՝ ընդդեմ Վրաստանի և Ադրբեջանի կառավարությունների։ Ինչ վերաբերում է պաշտոնական Թբիլիսիի արձագանքին՝ ներքին գործերի նախարարը և վարչապետն ասում են, որ Մուխթարլին ապօրինի է հատել սահմանը»։
Վրաստանի վարչապետ Գեորգի Կվիրիկաշվիլին, ընդգծենք, որ հայտարարել է, թե Վրաստանն այդ միջադեպում որևէ առնչություն չունի․ «Դա կտրականապես անընդունելի է: Ես բացառում եմ, որ Վրաստանում գործող պետական կառույցներից որևէ մեկը ներգրավված լիներ այս միջադեպում»։
Նորայր Գասպարյանը պատմեց, որ առևանգված լրագրողը Վրաստանում Ալիևների բիզնեսների հետ կապված լրագրողական հետաքննություն է անցկացրել. «Այդ մասին ադրբեջանական Meydan TV-ում երկու հոդված ունի։ Ընդդիմությունը՝ ի դեմս նախկին նախագահ Միխեիլ Սաակաշվիլու կուսակցության, մեղադրում է Վրաստանի իշխանություններին հենց հանձնման մեջ՝ պահանջում է ներքին գործերի նախարարի և ԱԱԾ պետի հրաժարականը։ Իսկ իշխանությունները հերքում են հանձնման մեղադրանքը, ասում են՝ ոչ մի բանից տեղյակ չենք, սպասում ենք հետաքննության ավարտին»։
Նորայր Գասպարյանը չի կարծում, որ սա կարող է Վրաստանում ներքաղաքական խմորումների առիթ դառնալ. «Միացյալ ազգային շարժումը» այդ պահանջից բացի, ուրիշ քայլ չի արել մինչ այժմ, և չեմ էլ կարծում, թե անի։ Եթե անեն՝ իշխանությունները պարզապես կպատասխանեն՝ ձեր ժամանակ ավելի վատ էր»։
Ինչ վերաբերում է Հայաստանին սպառնացող հնարավոր վտանգներին, լրագրողը նշեց, որ եթե առաջիկայում Հայաստանի որևէ լրագրող կամ իրավապաշտպան հայտնվի նույն դրության մեջ, ապա հազիվ թե մեր մասով նման միջադեպ տեղի ունենա. «Ըստ իս՝ այդ ժամանակ ավելի մեծ սկանդալ կհասունանա»։
Ընդգծենք, որ 2008 թվականի մարտի մեկի իրադարձությունների մասնակիցներից շատերն էին հատել Վրաստանի սահմանը՝ այստեղ չձերբակալվելու, քաղաքական հետապնդումների չենթարկվելու համար։ Ըստ որոշ տեղեկությունների՝ Վրաստանի իրավապահները հանձնել էին Հայաստանի իրավապահներին։
