Ադրբեջանական Salam News գործակալությունն անդրադարձել է խորհրդարանական ընտրությունների նախաշեմին Թուրքիայում քաղաքացիական իշխանությունների ու զինվորական վերնախավի միջև առճակատման վերջին զարգացումներին.
«Թուրքիայի նախագահ Աբդուլլահ Գյուլը որոշել է չմասնակցել Թուրքիայի զինված ուժերի ռազմական ակադեմիաների կուրսանտների (շրջանավարտների) այսօրվա ավարտական միջոցառմանը։
Թուրքական պետության ղեկավարն այդ մասին վճիռը կայացրել է երեկ երեկոյան, այսինքն՝ Թուրքիայի զինված ուժերի ռազմական ակադեմիաների հրամանատար, բանակի (գործող) գեներալ Բիլգին Բալանլըի ձերբակալման վճռի կայացումից ոչ շատ առաջ։
Այս կապակցությամբ թուրք վերլուծաբանների մոտ հարց է առաջացել. ինչո՞ւ Բալանլըի ձերբակալությունից հենց 48 ժամ առաջ նախագահ Գյուլը որոշեց չմասնակցել ռազմական ակադեմիաների գեներալի կողմից ղեկավարվելիք շրջանավարտների միջոցառմանը։ Արդյո՞ք դա չի նշանակում, թե նախագահը նախապես տեղեկացված է եղել Բալանլըի սպասվող ձերբակալման մասին, և որ այդ ամենը պլանավորված էր։
Այնուամենայնիվ, Թուրքիայի նախագահը խախտել է ևս մեկ հանրապետական բարի ավանդույթ։ Ճիշտ է, դրա համար նա ստիպված է եղել փոխել իր աշխատանքային գրաֆիկը։ Աբդուլլահ Գյուլը որոշել է այցելել եղբայրական Թուրքմենստան։
Եվ չնայած նախագահի աշխատակազմն ազդարարել էր մեկօրյա այցի մասին, Աբդուլլահ Գյուլն արդեն երկրորդ օրն է, ինչ գտնվում է Թուրքմենստանում, քանի որ Անկարա վերադառնալու դեպքում նա ստիպված կլիներ օդանավակայանից ուղիղ մեկնել դեպի ռազմական ակադեմիաների շրջանավարտների միջոցառման վայր։ Ռազմական ակադեմիաների շրջանավարտները, որոնց պետը ձերբակալվել է այդ միջոցառման նախօրեին, մեղմ ասած՝ զայրացած են»։
Հիշեցնենք, որ Բալանլըն «Բալյոզ» ռազմական հեղաշրջման գործով ձերբակալված ամենաբարձրաստիճան զինվորականն ու առաջին ձերբակալված գործող գեներալն է։