Համակարգչային խափանման հետևանքով, որը հանգեցրել է British Airways-ի չվերթների զանգվածային չեղարկման, ընկերության կորուստները կարող են գերազանցել Բրիտանիայի համար ռեկորդային 150 միլիոն եվրոն (190 միլիոն դոլար)` յուրաքանչյուր ուղևորին 225-540 եվրո փոխհատուցում վճարելու դեպքում: Այդ մասին գրում է Times պարբերականը:
Պարբերականը հղում անելով ավիացիոն փորձագետ Հովարդ Ուիլդոնին, ճշտում է, որ հետաձգումներից տուժածները կարող են ավիաընկերությանը ներկայացնել լրատվամիջոցներում նշվող 100 միլիոն եվրոյին նշանակալիորեն գերազանցող հաշիվ:
«Դա ոչ միայն երկու օր է, դա ուղիղ հարված է մարդկանց վստահությանը»,- նշել է փորձագետը:
British Airways ավիաընկերությունը չեղարկել է Հիթրոու և Գաթվիք օդանավակայաններից բոլոր չվերթները մինչև մայիսի 27-ը, դա բացատրելով ցանցում խոշոր սխալներով: Ավելի ուշ ընկերությունը հայտնել է, որ կփորձեն Հիթրոու և Գաթվիք օդանավակայանների չվերթները վերականգնել մայիսի 28-ին:
