Այսօր Լոռիում, որտեղ նշվում էր Ղարաքիլիսայի հերոսամարտի 99-րդ տարեդարձը, սենսացիոն, նույնիսկ կարելի է ասել` հեղափոխական հայտարարություն է արել խորհրդարանի փոխնախագահ Էդուարդ Շարմազանովը: «Հայ մեծահարուստները պետք է դատարկեն իրենց քսակները հանուն Հայաստանի»,-ասել է նա: Սա այն քիչ, հազվագյուտ դեպքերից է, երբ Հանրապետականի խոսնակը խոսում է ոչ թե էլիտա կոչվածի, այլ հենց ժողովրդի սրտից: Հասարակ մարդիկ գրեթե ամեն օր, տարբեր առիթներով, այդ նախադասությունն օգտագործում են և ունեն դրա բացատրությունը:
Աղքատության ճիրաններում հայտնված հասարակությունը կարծում է, որ Հայաստանում հարստացածների մեծ մասը սովորական թալանչիներ են, որ իրենց թե առաջին և թե մնացած միլիոնները կուտակել են ժողովրդի քրտինքի հաշվին` նրան կեղեքելով ու հարստահարելով: Շարքային մարդիկ մտածում են, որ իշխանությունն ու փողը, իշխանությունն ու թալանը հոմանիշներ են ու յուրաքանչյու օր պահանջում են, որ մեր հասարակության «լֆիկացած» ու «դոդացած» հատվածը դատարկի գրպանները` հանուն արդարության, այսինքն` ժողովրդի հետ կիսվի այն, ինչը նույն ժողովրդից թալանել է: Արդյո՞ք, նույն կերպ է մտածում Շարմազանովը և հոգու խորքում վստահ է, որ իր «սիրելի» նախագահի հովանու ներքո «բարգավաճող» օլիգարխները ժողովրդի հետ կիսվելու անհրաժեշտություն ունեն: Թե՞ Շարմազանովը կարծում է, թե առայժմ «արդարության» հաստատումը պետք է սահմանափակել միայն համակարգի ներսում, որովհետև, մեղմ ասած, արդար չէ, որ Մալաթիայի Սամոն, ՍԱՍ-ի Արտակը, Դերժավայի Արկադին իշխանության շնորհիվ միլիարդներ են դիզում, իսկ նույն Շարմազանովը կամ Աշոտյանը նույն այդ իշխանության երեսից ամեն օր «թուք ու մուր» են «ուտում»:
Շարմազանովի կոչը գուցե տեղավորվում է բացառապես ներհամակարգային պայքարի համատեքստում: Գուցե ԱԺ փոխխոսնակը ուղակի մեծահարուստներին` ներդրումներ անելու կոչ է անում, թեև դա ծիծաղելի կլինի, որովհետև մեր օլիգարխները բոլորից լավ գիտեն, որ Հայաստանը ոչ թե փող ներդնելու, այլ` փողեր «լվալու» տեղ է: Արդյո՞ք մեր օլիգարխներին պետք է ստիպել, որ «մուծվեն», եթե նրանք ինքնակամ «չդատարկեն իրենց քսակները հանուն Հայաստանի»:
Արդյո՞ք Շարմազանովի հայտարարությունը համաձայնեցված է Սերժ Սարգսյանի հետ և Հայաստանում սպասվում է սեփականության նոր վերաբաժանում` իշխանության փոխանցման կամ վերարտադրության ֆոնին: Սրանք բնավ էլ հռետորական հարցեր չեն, եթե նկատի ունենանք, որ Շարմազանովը միշտ աչքի է ընկել զուսպ և Սերժ Սարգսյանի դիրքորոշումներն արտահայտող տեսակետներով:
