Չինաստանի իշխանությունները դժգոհ են G7-ի գագաթնաժողովի արդյունքներով հայտարարությունից, որը վերաբերում է վիճելի տարածքներին Արևելաչինական և Հարավչինական ծովերում: Այս մասին հայտնում է RIA Novosti-ն՝ հղում անելով այդ երկրի ԱԳՆ պաշտոնական ներկայացուցիչ Լու Կանին:
«Չինական կողմի դիրքորոշումը Արևելաչինական և Հարավչինական ծովերի հարցերում հստակ և հետևողական է: Չինաստանը միշտ հանդես է եկել և հանդես է գալիս համապատասխան վեճերը անմիջապես վեճի կողմերի հետ բանակցությունների և խորհրդակցությունների միջոցով կարգավորելու օգտին»,- հայտարարել է գերատեսչության ներկայացուցիչը:
Լու Կանը հույս է հայտնել, որ G7-ի պետությունները կշարունակեն պահպանել չեզոքությունը վեճի կողմերի հանդեպ և հարգանք կդրսևորեն ջանքերի նկատմամբ, որոնք ներդնում են տարածաշրջանի երկրները խնդրի լուծման համար:
Չինացի դիվանագետը նաև G7-ի երկրներին կոչ է արել վերջ տալ «անպատասխանատու հայտարարություններին» և կառուցողական դեր խաղալ տվյալ տարածաշրջանում խաղաղության և կայունության պահպանման գործում:
Ավելի վաղ G7-ի պետությունների ղեկավարները մտահոգություն էին հայտնել տարածաշրջանի իրավիճակով և դեմ էին հանդես եկել ցանկացած միակողմանի գործողության, որը կարող է հանգեցնել լարվածության սրման: Նրանք նաև հաստատել էին հավատարմությունը ծովային տարածքային վեճերը երկխոսության և իրավունքի, այդ թվում՝ արբիտրաժային դատարանի միջոցով հարթելուն: