«Տեղեկատվության ազատության մասին» օրենքում մի շարք փոփոխություններ կկատարվեն: Օրենքի փոփոխության անհրաժեշտությունն առաջին հերթին պայմանավորված է նոր Սահմանադրությամբ, քանի որ որոշակիորեն փոխվել են կարգավորումները, այս իրավունքը ամրագրվել է որպես մարդու հիմնական իրավունք: «Առաջին լրատվական»- ի հետ զրույցում այս մասին ասաց ՀՀ արդարադատության նախարարի տեղեկալ Սուրեն Քրմոյանը՝ հավելելով, որ փորձել են Սահմանադրությանը համահունչ կարգավորումներ իրականացնել:
Քրմոյանի հավաստմամբ՝ այս գործընթացը սկսվել է 2 տարի առաջ, նախաձեռնությունը քաղաքացիական հասարակությանն է: Բարձրացվում են մի շարք խնդիրներ, որոնց պատճառով ազատության իրավունքը խոչընդոտվում էր:
«Փորձել ենք լուծումներ գտնել, առաջին հերթին կառավարության որոշմամբ համապատասխան կանոնակարգումներ նախատեսեցինք, կառավարության որոշումից հետո ի հայտ եկան խնդիրներ, որոնք օրենքի կարգավորման առարկա են, որովհետև տեղեկություններ տնօրինողները ոչ թե միայն կառավարության ենթակա մարմիններն են, այլ իշխանության բոլոր ճյուղերը, և ըստ այդմ՝ մենք փոխել ենք օրենքը:
Բացի դրանից՝ ավելի քան մեկ տասնամյակ առաջ ընդունված օրենքում կան կարգավորումներ, որոնք հնացել են, այդ օրենքով էլեկտրոնային հարցումների հետ կապված հարաբերությունները կարգավորված չեն:
Մարդու իրավունքները երաշխավորելու համար օրենքի այս նոր նախագիծն է մշակվել: Մենք քննարկել ենք անկախ մարմին ստեղծելու լուծումներից մեկը, փորձում ենք արդարադատական մեխանիզմներ ստեղծել տեղեկատվության ազատության իրավունքի իրականացման համար:
Կարծում եմ՝ քննարկումների արդյունքում կհանգենք եզրակացության և այդ ինստիտուցիոնալ համակարգի վերաբերյալ կոնսենսուսային լուծում կունենանք»,- նշեց Քրմոյանը:
Մանրամասները՝ տեսանյութում: