Բելգիայի թագավորական ընտանիքը խստորեն քննադատել է արագ սննդի Burger King ռեստորանների ցանցի գովազդը և այն թագավոր Ֆիլիպի արժանապատվությունը վիրավորող է համարել: Աս մասին հայտնում է BBC-ն:
Հաղորդվում է, որ Burger King-ի գովազդային ինտերնետ-հայտարարությունը, որը հունիսի վերջին պետք է սկսի աշխատել Բելգիայում, բելգիացիներին առաջարկում է ընտրել թագավոր Ֆիլիպի և «բորգերների թագավորի»՝ ռեստորանային ցանցի խորհրդանիշի միջև: Միաժամանակ, եթե օգտատերն ընտրում է Բելգիայի թագավորին, համակարգը երկու անգամ ճշտում է՝ արդյոք հաճախորրդը վստահ է իր ընտրության մեջ: «Դուք վստա՞հ եք: Չէ՞ որ նա ձեզ համար կարտոֆիլի ֆրի չի պատրաստի»,- ասվում է հայտարարության մեջ:
«Մենք դատապարտում ենք այդ հնարքը: Քանի որ այն կոմերցիոն նպատակներ ունի, մենք թույլտվություն չենք տա»,- մեջբերում է BBC-ն թագավորական ընտանիքի ներկայացուցիչ Պյեր Էմանուել դե Բոյի հայտարարությունը:
Միևնույն ժամանակ նշվում է, որ Burger King ընկերությունն առայժմ ոչ մի ծանուցում չի ստացել թագավորական ընտանիքից: