G7-ի երկրները կոչ են արել Ռուսաստանին և Իրանին ազդեցություն ցուցաբերել Դամասկոսի վրա՝ կրակի դադարեցման համար։ Նրանք ակնկալում են, որ Աստանայի բանակցությունների որոշումը դեէսկալացիոն գոտիների վերաբերյալ կհանգեցնի Սիրիայում բռնության իրական դադարեցման։ Այս մասին ասվում է «Մեծ յոթնյակի» ամփոփիչ հայտարարությունում՝ փոխանցում է RIA Novosti-ն։
«Նրանք, ովքեր ազդեցություն ունեն սիրիական ռեժիմի վրա, հատկապես Ռուսաստանն ու Իրանը, պետք է անեն հնարավոր ամեն բան և ազդեցություն ցուցաբերեն ողբերգության դադարեցման համար՝ սկսելով կրակի դադարեցման ռեժիմի ամրապնդումից, քիմիական զենքի կիրառման դադարեցումից, անվտանգության ապահովումից, կարիքավոր մարդկանց անխոչընդոտ և անհապաղ մարդասիրական հասանելիությունից, ապօրինաբար ձերբակալվածների ազատ արձակումից, ինչպես նաև բանտեր ազատ հասանելիության ապահովումից»,-նշվում է փաստաթղթում։
«Յոթնյակի» երկրները նաև հույս են հայտնել, որ Աստանայի համաձայնագիրը կարող է արդյունավետ ներդրում ունենալ բռնության դեէսկալացիայի գործում։
«Եթե Ռուսաստանը պատրաստ է կիրառել իր ազդեցությունը դրական առումով, ապա մենք պատրաստ ենք աշխատել նրա հետ Սիրիայում հակամարտության լուծման վրա։ Մենք պատրաստ ենք ներդրում անել երկրի վերականգնման գործում, երբ ձեռք բերվի կայուն և վստահություն ներշնչող քաղաքական անցում»,-ընդգծվում է փաստաթղթում։
