«Արդարադատության նախարարն առաջվա լծակները չունի դատարանների վրա: Եվ ասել, որ Դավիթ Հարությունյանը կկարողանա առաջվա պես ազդել դատարանների վրա, արդար չէ»,-«Առաջին լրատվական»-ի հետ զրույցում ասաց նախկին դատավոր Պարգև Օհանյանը՝ անդրադառնալով արդարադատության նախարարի նշանակմանը:
Նշենք, որ Սերժ Սարգսյանի հրամանով նախօրեին Դավիթ Հարությունյանը նշանակվեց Արդարադատության նախարար:
Եվ հետո, նախկին դատավորի խոսքով, դատական համակարգում առկա բացասական երևույթները նախարարից չէին գալիս, այլ ավելի բարձր օղակից: «Ավելի բարձ քաղաքական օղակից էր գալիս այդ ամենը: Եվ հիամ, ես չէի ասի, որ վատ նշանակում է: Դավիթ Հարությունյանը լավ իրավաբան է, լավ կազմակերպիչ է, շատ աշխատասեր: Մի խոսքով լավ նախարար է և կարող է լավ նախարար լինել: Այլ հարց է, որ հիմա նախարարությունից, նախարարից շատ բան կախված չէ: Արդարադատության նախարարությունը արդարադատության հետ ոչ մի կապ չունի»,-ասաց Օհանյանը:
Հիշեցնենք, որ Դավիթ Հարությունյանը ՀՀ արդարադատության նախարարությանը ղեկավարել է 1998-2007թվականներին: Այնուհետև մինչ 2010 թվականը արդարադատության նախարար է եղել Գևորգ Դանիելյանը, ով պաշտոնից ազատվել է պաշտոնեական պարտականությունները ոչ պատշաճ կատարելու համար: 2010 թվականից հետո Արդարադատության նախարար նշանակվեց Հրայր Թովմասյանը, ով պաշտոնին հրաժեշտ տվեց 2014 թ. ապրիլի 30-ին: Այնուհետև շատ կարճաժամկետ Արդարադատության նախարար եղավ Վրաստանում ՀՀ դեսպան Հովհաննես Մանուկյանը, որին անցած տարի փոխարինեց Արփինե Հովհաննիսյանը: Մեկ տարի ու մի քանի ամիս անց կրկին փոխվեց Արդարադատության նախարարը և Դավիթ Հարությունյանը վերադարձավ նախարարի իր պաշտոնին:
Պարգև Օհանյանից հետաքրքրվեցիքն՝ արդյոք նախարարների այս անընդհատ փոփոխությունը չի՞ ազդում համակարգի զարգացման վրա: Նոր նախարարը մինչև համակարգին ծանոթանում է, նրան ազատում և նոր նախարար են նշանակում: «Նայած թե համակարգ ասելով ինչ ենք հասկանում: Նախարարությունը դատարանների հետ կապ չունի, ռազմավարությունը կառավարությունն է մշակում: Սա ընդամենը դերերի բաշխման քաղաքական նպատակահարմարությունից դրդված պաշտոն է: Օրինակ Արփինե Հովհաննիսյանը իրեն շատ լավ դրսևորեց ու հիմա նշանակվեց ԱԺ նախագահի տեղակալ: Նա խարիզմայով, խելացի մարդ է, բայց ես համոզված եմ, որ արդարադատության նախարարությունը երիտասարդ, չամուսնացած աղջիկների տեղը չի: Նախարարի պորտֆելը մի քիչ ավելի փորձով, նստած մարդու տեղ է»,-նկատեց նախկին դատավորը:
Լուսանկարը՝ Photolure-ի