Վարչապետ Կարեն Կարապետյանը տարբեր հարցազրույցներում նշել է, որ ինքը կցանկանար 2018-ից հետո շարունակել պաշտոնավարել՝ որպես վարչապետ: «Առաջին լրատվական»- ի հետ զրույցում այս մասին ասաց քաղաքական և ընտրական տեխնոլոգիաների փորձագետ Արմեն Բադալյանը՝ անդրադառնալով հարցին, թե արդյոք Կարեն Կարապետյանը կշարունակի պաշտոնավարումը 2018-ից հետո, թե Ս. Սարգսյանը կստանձնի այդ պաշտոնը:
Փորձագետի դիտարկմամբ՝ երբ որ վարչապետը եկավ, կար դրական սպասում, երկրում վիճակը շատ վատ էր, մտածում էին, որ նա ինչ-որ գործողություններ կիրականացնի. «Սակայն 9 ամսվա ընթացքում մենք տեսանք, որ նա որևիցե դրական գործունեություն չիրականացրեց, նա այդպես էլ մնաց մենեջերի կերպարի մեջ, իսկ մենեջերները թիմակիցներ չեն ունենում:
Մենք չենք կարող ասել, որ ՀՀԿ-ի մեջ կան թիմեր: Թիմեր առաջ կային՝ Հովիկ Աբրահամյանի օրոք, որոնք ցանկանում էին և աշխատում էին իրենց ղեկավարին տեսնել թիվ մեկ պաշտոնյայի դերում: Կ. Կարապետյանն ունի կողմնակիցներ, ընկերներ ՀՀԿ-ում, բայց թիմ չունի, թիմը կազմակերպված մարկանց խումբն է, որը նպատակ ունի և աշխատանք է տանում այդ նպատակի համար: Մենք տեսնում ենք, որ այդ նպատակը չկա: Նախարարները վերանշանակվել են, սա խոսում է այն մասին, որ Հայաստանում սկսվում է լճացման գործընթաց, վարչապետն ապագան ցույց չի տալիս, նա զբաղված է ինչ-որ փաստաթղթերում, կանոնադրություններում փոփոխություններ մտցնելով: «Վարչապետը ցույց չտվեց Հայաստանի զարգացման մոդելը: Նա քայլեր չի կատարում»,- ընդգծեց Ա. Բադալյանը:
Փորձագետի խոսքով՝ գաղտնիք չէ, որ այս պահի դրությամբ Հայաստանի ղեկավարը պետք է Մոսկվայից «դաբրո» ստանա. «Ուղղակի քանի որ Ռուսաստանի հետ դեռևս այդ հարցը չի հստակեցվել (ամենայն հավանականությամբ աշնանը կհստակեցվի) դրա համար նախագահն այս «ինտրիգը» կձգի, մինչև որ Ռուսաստանը որոշում կկայացնի»:
Ա. Բադալյանի կարծիքով՝ Կարապետյան-Սերժ Սարգսյան հակասություն, դիմակայությունն գոյություն չունի, ընդամենը մրցակցություն է թիվ մեկ ղեկավար լինելու համար: Նրա խոսքով՝ հակասություն լինում է այն դեպքում, երբ լինում են առանձին թիմեր, որոնք երկրի զարգացման այլ տարբերակներ են նախանշում: Մինչդեռ, ըստ փորձագետի, որևիցե տարբերություն չկա տնտեսական քաղաքականության մասին նախագահի հայացքների և վարչապետի կողմից իրականացվող տնտեսական քաղաքականության միջև:
Մանրամասները՝ տեսանյութում: