Ազատության հրապարակում մայրաքաղաքի ու hանրապետության մի շարք դպրոցների 12-րդցիներ տոնում են «Վերջին զանգի» տոնակատարությունը:
«Դպրոցական տարիքում նաև սիրահարվել եմ»,- այս մասին այսօր լրագրողների հետ զրույցում ասաց Ազատության հրապարակ այցելած Երևանի քաղաքապետ Տարոն Մարգարյանը: Նա նշեց, որ «Վերջին զանգը» իր համար էլ է հիշարժան, պատմական օր եղել և մանրամասնեց. «Ինչպես բոլոր երիտասարդներ են այսօր վերջին զանգն անցկացնում, այնպես էլ մենք ենք անցկացրել: Մենք էլ դասարանցիներով հավաքվել ենք, ուրախացել ենք, հետո պատրաստվում էինք ավարտական քննություններին»:
Թե ինչպիսի աշակերտ է եղել, Տարոն Մարգարյանը նշեց, որ պետք է իր ուսուցիչներին հարցնել: Հարցին՝ հաճախակի՞ է դասերից բացակայել, Երևանի քաղաքապետը պատասխանեց. «Չէ, փորձել եմ ինչքան հնարավոր է կրթություն ստանալ, քանի որ մանկավարժի ընտանիքում եմ եղել, իմ տատիկը, պապիկը մանկավարժներ են եղել, շատ խիստ էին, մեր ընտանիքում պետք է բոլորը սովորեին»: