Ռուսաստանցի փորձագետները պատկերացում չունեն այն մասին, թե ինչ նոր զինատեսակներ կարող է ստանալ Հայաստանը Ռուսաստանի Դաշնությունից:
Հիշեցնենք, որ ՀՀ պաշտպանության նախարարության պաշտպանական քաղաքականության վարչության պետ Լևոն Այվազյանը լրագրողների հետ զրույցում ասել էր, որ Հայաստանը զենքի նոր խմբաքանակ է ստանալու 2018-19թթ.՝ հայ-ռուսական վարկային համաձայնագրի շրջանակներում, բայց չէր մանրամասնել, թե կոնկրետ ի՞նչ զինատեսակների մասին է խոսքը:
Մոսկվայի Քաղաքական և ռազմական վերլուծությունների կենտրոնի փոխտնօրեն, ռազմական փորձագետ Ալեքսանդր Խրամչիխինը «Առաջին լրատվական»-ի հետ զրույցում նշեց. «Որևէ կոնկրետ տվյալ ես չունեմ: Իսկ ընդհանրապես համագործակցության շրջանակը շատ լայն է, ուստի կարող է տրամադրվել ցամաքային զորքերի համար նախատեսված ցանկացած զինատեսակ, որովհետև Հայաստանը առաջին երկիրն է, որ ստացել է «Իսկանդեր» համակարգեր, ուստի որևէ սահմանափակում չկա»:
Փորձագետը անդրադարձավ նաև այն տեղեկություններին, որ հայկական զինված ուժերը տիրապետում են մարտական կամ հարվածային անօդաչու թռչող սարքերի (ԱԹՍ), որոնք վերջերս կիրառվել են Ադրբեջանի զինուժի դեմ:
Հարցը մեկնաբանել էր նաև ՀՀ ՊՆ պաշտպանական քաղաքականության վարչության պետը՝ ասելով հետևյալը. «Անօդաչուներ նոր չէ, որ մենք կիրառում ենք, արդեն բավական երկար տարիներ կիրառում ենք: Ինչ վերաբերում է հարվածային անօդաչուներին, եկեք ես ձեռնպահ մնամ այդ հարցի պատասխանից, որովհետև դա գաղտնիություն է պարունակում»:
Ալեքսանդր Խրամչիխինը քիչ հավանական է համարում այն տարբերակը, որ Հայաստանը հարձակողական ԱԹՍ-ները կարող էր ստացած լինել Ռուսաստանի Դաշնությունից, որովհետև վերջինս ինքը խնդիրներ ունի այս ոլորտում: Իսկ ընդհանրապես հարձակողական ԱԹՍ-ներ, ըստ փորձագետի, ունեն Միացյալ Նահանգները, Իսրայելը և Չինաստանը, բայց դժվար է ասել, թե այս երկրներից ո՞րն է Հայաստանին մատակարարել նմանատիպ զինատեսակներ:
«Միացյալ Նահանգներից դժվար ստացած լիներ, իսկ Իսրայելից և Չինաստանից՝ միանգամայն հնարավոր է: Թեև Իսրայելը անօդաչուներ է մատակարարում նաև Ադրբեջանին, բայց կարծում եմ, որ իր համար դա խնդիր չէ»,- ավելացրեց ռազմական փորձագետը:
Ալեքսանդր Խրամչիխինը տեսականորեն չի բացառում հայկական զինուժի համագործակցությունը այս ոլորտում նաև Իրանի հետ:
Քաղաքագետ Մոդեստ Կոլերովը իր հերթին նշեց, թե Հայաստանի իշխանությունները վաղուց են հայտարարել, որ Հայաստանն ունի անօդաչու սարքերի սեփական արտադրությունը:
Հարցին «Առաջին լրատվական»-ի հետ զրույցում անդրադարձել էր նաև մեկ այլ հայտնի ռազմական փորձագետ՝ Վլադիմիր Եվսեևը՝ ասելով, թե իրեն ուրախացնում է հայկական կողմից հարվածային ԱԹՍ-ների հայտնվելը: Փորձագետի գնահատմամբ՝ այս հանգամանքը ռազմական ուժի նոր հավասարակշռություն է ստեղծում հայկական և ադրբեջանական կողմերի միջև:
«Նախկինում դրա մասին չէին խոսում, կարծիք կար, թե Հայաստանը միայն հետախուզական ԱԹՍ-ներ ունի: Այսօր հայտնվել են նաև հարձակողական անօդաչուներ: Սա խոսում է ռազմական նոր հավասարակշռության մասին, երբ հայկական կողմը, ի պատասխան նմանատիպ գործողությունների, կարող է հարված հասցնել ադրբեջանական կողմին արդեն Ադրբեջանի տարածքի խորքում, այսինքն՝ հարվածել թիկունքին, կարևոր օբյեկտներին»,- ասել էր Եվսեևը: