Սեյրան Օհանյանի կինը՝ Ռուզաննա Խաչատրյանը, որը «Օհանյան-Րաֆֆի-Օսկանյան» դաշինքի նախընտրական ամփոփիչ հանդիպմանը բավականին քննադատություն հնչեցրեց իշխանությունների հասցեին, հիմա միանգամայն այլ դիրքորոշում է հայտնում: Հիշեցնենք, որ նա, անդրադառնալով իր դեմ քննադատական հրապարակումներին, նշել էր. «Ես այսօր ևս կրկնում են, որ իշխանությունը պետք է փոխվի, որովհետև իշխանության ղեկին գտնվում են մարդիկ, որոնք կազմակերպում են ընտանիքների և հատկապես՝ կանանց նկատմամբ այդ տեղեկատվական տեռորը: Իմ դեմ արշավ է եղել, և միանշանակ՝ իշխանության կողմից․ ընտանիքը, եթե գեղեցիկ է, չի նշանակում, որ մեծ գումարներ են այնտեղ ներգրավված»:
Խորհրդարանական ընտրությունների արդյունքում ՕՐՕ դաշինքի պարտությունից հետո Սեյրան Օհանյանը մեկնեց Հայաստանից: Մամուլը գրում էր, որ նա չի ցանկանում Հայաստան վերադառնալ: Նրա կինը՝ Ռուզաննա Խաչատրյանը tert.am-ի հետ զրույցում ասել է, որ Սեյրան Օհանյանը վերադարձել է: Ի պատասխան հարցի, թե մամուլում շրջանառվում էին տեղեկություններ, որ Սեյրան Օհանյանը արտագաղթել է Ռուսաստան, տիկին Խաչատրյանն ասաց. «Սրանք երևի թե մամուլի ենթադրություններն էին: Դուք գիտեք, որ ինքը երկար տարիներ մեր ռազմաքաղաքական պատասխանատուներից մեկն է և չի դադարի երբևիցե լինելուց: Չեմ կարծում»։
Նա նաև նշել է, որ ինչպես մեր երկրում յուրաքանչյուր քաղաքացի՝ մտահոգված երկրի ապագայով, Սեյրան Օհանյանն իր կարծիքը կհայտնի. «Միայն ասեմ, որ նորմալ, մարդկային հարաբերություններ ունի բոլոր կուսակցությունների, երկրի բոլոր կարևոր պաշտոններում գտնվող անձանց հետ: Այ սա կարող եմ հաստատ ասել: Բոլորը բոլորի հետ շփվում են, անկախ նրանից, թե ինչպիսի կարծիքներ ունեն ապագայի (երկրի կառավարման ձևի) վերաբերյալ: Եվ երբևիցե չեմ կարծում, որ այդ հարաբերությունները թշնամական կլինեն»:
ՀՀԿ խմբակցության ղեկավար Վահրամ Բաղդասարյանը, անդրադառնալով հարցին, թե հնարավո՞ր է Սեյրան Օհանյանն անսպասելի վերադառնա իշխանություն, արձագանքեց. «Ես ուրիշների կանանց չեմ մեկնաբանում»:
Իսկ թե ինչպես են Սեյրան Օհանյան-իշխանություն հարաբերությունները, պատասխանեց. «Ինչպես միշտ, մենք նման քննարկում չենք ունեցել, նա եղել է մեզ հետ, աշխատել է մեզ հետ, իր կամքով գնացել է ընդդիմություն, մենք նրան դիտարկել ենք որպես ընդդիմադիր և որևէ այլ առնչություն և այլ քննարկումներ մենք չենք ունեցել»:
Արդյո՞ք հնարավոր է՝ նրան նոր պաշտոն առաջարկվի, Վահրամ Բաղդասարյանն արձագանքեց. «Չի եղել նման քննարկում և չկա նման խնդիր»:
Հարցին՝ դուք նրան ընդդիմադիր եք հիմա դիտարկում, ասաց. «Ընդհանուր առմամբ, քաղաքական դաշտում ընտրություններից հետո ես չեմ տեսել Սեյրան Օհանյանին, որ հիմա դիտարկեմ: Բնականաբար ինքը ընդդիմադիր կեցվածքով մտել էր քաղաքական դաշտ և մասնակցում էր ընտրություններին»:
Նա նաև նշեց, որ հետընտրական զարգացումներ, վիճարկումներ չեղան ո՛չ ՕՐՕ-ի, ո՛չ էլ մյուս ուժերի կողմից. «Ոչ ոք չգնաց, որովհետև ընտրություններն այնքան համոզիչ էին, որ որևէ մեկն առիթ չուներ հետընտրական ինչ-որ հետևանքների հետևից գնալու»:
Երեկ կառավարության շենքի մոտ համաներմամբ ազատ արձակված Վոլոդյա Ավետիսյանը հայտարարել էր, որ Սեյրան Օհանյանը ընդդիմադիր չէ, նրան իշխանությունն է գործուղել: Վահրամ Բաղդասարյանից հետաքրքրվեցինք՝ ինչ կարծիք ունի այս հայտարարության վերաբերյալ. «Ես Վոլոդյա Ավետիսյանին չեմ ճանաչում անձնապես, մեկ միլիոն մարդ կարող է տարբեր կարծիքներ ասել, ես պարտավոր չեմ մեկնաբանել, ես ասացի իմ կարծիքը»: