ԱՄՆ Հայ դատի գրասենյակի (ANCA) գործադիր տնօրեն Արամ Համբարյանը անդրադարձել է ԱՄՆ նախագահ Դոնալդ Թրամփի վարչակազմի ներկայացրած բյուջերի նախագծին, ըստ որի նախատեսվում է Հայաստանին տրամադրվող օգնությունը կրճատել շուրջ 70 տոկոսով:
«Մտահոգված ենք նախագահ Թրամփի անխոհեմ և սխալ առաջարկից, ըստ որի նախատեսվում է կտրուկ կրճատել Հայաստանին տրամադրվող օգնությունը: Բյուջեի այս հանձնարարականը շեշտում է Կոնգրեսի հատկացումների հարցերով հանձնաժողովի հետ աշխատելու անհրաժեշտությունը՝ նախատեսվող կրճատումները չեղարկելու նպատակով»,-մեջբերում է The Armenian Weekly–ն Համբարյանի խոսքերը:
Համբարյանը նաև նշել է, որ ANCA-ն կանի հնարավոր ամեն ինչ, որպեսզի Թրամփի բյուջեով փախստականների համար նախատեսված 2.75 միլիարդ դոլարից գումար հատկացվի նաև Հայաստանին, որը սիրիացի փախստականներ է ընդունել վերջին տարիներին:
Ավելի վաղ հաղորդել էինք այն մասին, որ ԱՄՆ նախագահ Դոնալդ Թրամփի վարչակազմը Կոնգրեսի համար հրապարակել է 2018թ. ֆինանսական տարվա (FY18) բյուջեի վերաբերյալ հանձնարարականները, ըստ որի նախատեսվում է Հայաստանին տրամադրվող օգնությունը կրճատել 67 տոկոսով: