Բրյուսելում մեկնարկում է ՆԱՏՕ-ի՝ վերջին տասնամյակի ընթացքում ամենակարճատև գագաթնաժողովը: Այն կտևի մոտ 9 ժամ, ընդ որում՝ ժամանակի մեծ մասը նվիրված կլինի հանդիսավոր տարբեր միջոցառումների, ներառյալ դաշինքի նոր կենտրոնակայանի և երկու հուշահամալիրների բացմանը՝ հայտնում է TASS գործակալությունը։
Միակ աշխատանքային նսստաշրջանը կկայանա գործնական ընթրիքի ձևաչափով և կտևի մոտ 3 ժամ: Առաջին 1.5 ժամում երեքրոպեանոց ճառերով հանդես կգան ՆԱՏՕ-ի գլխավոր քարտուղար Յենս Սթոլթենբերգը և դաշինքի բոլոր 28 պետությունների ղեկավարները: Հաջորդ 1.5 ժամը նրանք կտրամադրեն գագաթնաժողովի երկու առանցքային թեմաների՝ ռազմական ծախսերի ավելացման և ԴԱԻՇ ահաբեկչական խմբավորման դեմ պայքարի քննարկմանը: Այդ քննարկումն առանձնակի նշանակություն կունենա Մանչեսթերում կատարված ահաբեկչության ֆոնին:
ԱՄՆ նախագահ Դոնալդ Թրամփն առաջին անգամ ելույթ կունենա ՆԱՏՕ-ի բարձր մակարդակով հանդիպմանը: Բրյուսելում նրանից ակնկալում են դաշինքի շրջանակներում Վաշինգտոնի ստանձնած բոլոր պարտավորությունների հավաստումը, իսկ փոխարենը անդամ երկրները կխոստանան մեծացնել իրենց պաշտպանական բյուջեները և ընդլայնել զենքի ու տեխնիկայի գնումները, որոնց հիմնական մատակարարը ԱՄՆ-ի ռազմարդյունաբերական համալիրն է։